يرب رجعني جاهل مو حلو الشيب
تجاعيدي كلَت لون البراءة
ولا اريد أعرف الحب والعلاقات
ولا اريد التطور وأنتماءه ..
وأضوجن صدگ يو من صاحبي يگول
أفنك وين واصل بالقراءة ..
وترد مشراگة اشتا .. وگعدة الباب
ويرد نوم الظهر يم الروازين
ويرد ليل الصدگ بالسبعة بالليل
ونفز وي غبشة طيور البساتين
چِنه بعوز لكن چِنه تجار ..
ضحكنا بلا گلب يسوى الملايين
بياض شكثر بينا وچِنه ملحان
من نلتم سويّة انضوّج التين
اليچذب ترة يذبونه بالنار
هذا اكبر قسم گد ما مساكين
نتزاعل صدگ بس حدنا للنوم
اعلى فطرتنا رغم ما چنه وكحين
نتمرض وناكل تربة ونطيب
ويجي لبيوتنا ويتعنى الحسين
شحلاة العابنا وحتى احلى من هاي
مثل البشر چانت كلها من طين
مليت التصنع والتفاهات ..
اريد ارجع وأشخبط عالحياطين







حسين التوبي