لاحظت وجود نقص في محتوى القصائد الشعبية الي تكون صحيحة املائياً و قليلة التعديل و الزخارف و ما الى ذلك من قبيل
ف حبيت انشئ هذا الموضوع لإدراج القصائد الصحيحة املائياً, اتمنى الكل يستفاد و اهلاً بأي شخص عنده مشاركة هادفة
اشعار شعبية صحيحة املائياً
لاحظت وجود نقص في محتوى القصائد الشعبية الي تكون صحيحة املائياً و قليلة التعديل و الزخارف و ما الى ذلك من قبيل
ف حبيت انشئ هذا الموضوع لإدراج القصائد الصحيحة املائياً, اتمنى الكل يستفاد و اهلاً بأي شخص عنده مشاركة هادفة
الهوى يلتم عليه منين ما ذكروك
وادگ رجلي و اظل بعازة الخنگة
واغص بريحتك ما گمت اغص بالزاد
المفارگ النسمة العابرة تغرگه
مو بس الصواب النفس هم كتال
سهم يمشي الخريف برية الورگة
نيتك صافية و تعرف شلون تروح
وتندل يا حلم من ليلك تشگه
صحرى بعين بدوي اتمنى روحي تصير
على حرورة رملها يطگ عشب خلگه
من اشوفك حسبت حضنك يصير گماط
وتدگ روحك صليب بضلعي بالشبگة
واشد من غيبتك ماصخ طلع ملگاك
اجيت و جدمي ليل و دمعتي تسبگه
انا مالح و اغزر من ادوس الگاع
شني ما غزرت وياك بالملگى؟
رايدلي خلگ يعبر صهيل الليل
عليّ گامت طيوفك من تجي مدنگة
شصغر بية و عفتني و كبرت فرگاك؟
دمعتي و صورتك فوگ الجفن رفگة
عليك من انسأل تصفن بروحي سنين
وما اميز بين اللچمة و الدگة
العليّ سألوك هم سألوني و احتاريت
سويتك نبي و گلت انجبر حگه
واناشغ و البچي يوصل لسابع ليل
وفشلتي بدمعة تبدي و تنتهي بصفگة
طش بديرتي حتى التفت و الگاك
اختنگ صدري و متت بمدافع السحگة
گبل ما اجر نفس الا الهوى المر بيك
چنت بكيف روحي من الهوى استنگى
اليحط عينه بگفاي يشوف الملاگيه
مبين شكو بروحي شعافت الحرگة
الچنت گبالهم طولي على گد الشوف
صغرت بعينهم من كبرت الفرگة
بعيدة ولايتك و الصدفة فكت باب
واجيت و من لگيتك وجهك مسرگة
من عندها و عرفت بنشغة المكتول
وشتعوف الرصاصة حرورة بالتفگة
من اموت برودتك خليها عالتابوت
وبإيدك كون نعش جنازتي تطبگه
وخليلي دمعتك عالگبر نيشان
خاف بجفن گبري دموع ما تلگة
وخاف يمر وكت و تزورني من بعيد
تدليك بمكاني حرورة الشهگة
ترس روحي الضباب و بينت وياك
كلي بروحك امشي و جرحي ما شفته
انا بالنسمة اعثر و انت قيس الحال
مو جدمي وراك خيالي ما شلته
واجي بواهس عذر و حروفي مني تطيح
واتبدى على وجهك مستحى و سكتة
وانخل غير وجهك و اليطيح تراب
وانكتهم و اهزهم بس تظل انتَ
رمح فرگاك اجاني مسابگ وية الريح
ما قصرت تسلم بالنفس جبته
بس المحترگ يفهم حچي الدخان
ويعرف حرورته و يفهم سبب علته
مثل عاشگ بغربة و مره وكت غروب
يفرفح من يمر طاري الهوى يموته
انا بخصر السنابل چم حلم ضميت
وطعم شبگة المنجل من رحت ضگته
الندى عمره مسافة و من يطيح يموت
وانا بعمر الندى و فجرك وصل وكته
اذا فوگ الورد لو فوگ صخرة يطيح
ما تفرق بعد لو عمري طيحته
انا مبلل عشگ يا اليبست ملگاك
رحت و خيال وجهك عيني حاضنته
واظفر بالخلگ بلكت گصيبة يصير
وضوة چفوفك بصدري الگاها ظافرته
واغص بالليل و اگصر و المسافة تطول
واجي و تعثر عيوني بكل اثر عفته
واجي مغيم سهر يمك و انگط ليل
وطرت مو بالسما لا بالحچي الگلته
وعكس جية الضوة روحك بروحي تطير
وعبرنا السابعة و جناحي ما درته
ولحد ثامن سما وصلت الشهگة وياك
واسافر و التراب بجدمي ما دسته
ونكثت ثيابي يمك چان بيهن غيم
من ثامن سما للگاع وصلته
على غصن انتظارك ريح ما هبيت
وزرعت الميل بية و خضرت دگته
انتَ العلمتني شلون افك ذرعان
للملگى الموادع ما تعلمته
من يكبر فراغك صدري چان يضيگ
وانا البد بعطرك ما تنفسته
اگدّر بالضوة بس ما رهم وياك
وعلى گد الشمس ملگاك فصلته
وافك نشاب صدري لكل سهم بي روح
واكفر بالحنين الما اجى بوكته
الترس راسي بغيابك ريحة البارود
ساتر و الرصاص يخيط بگصته
طفى وجهي بخيالك لو بعد موجود؟
من نجمة على نجمة الليل ورثته
المطر يوگع مغمض و التراب يشوف
ما بللت وجهي و سافرت سكتة؟
مو ما شفت وجهك ما شفت مگفاك
شأمد ايدي و گفاك بعيني ما لحته؟
يا نسمة و سافرت يم ناس مخنوگين
الهوى ضيگ عليهم و انتَ كبرته
تعال اشلع الطين البي عرگ ملگاك
بيا صحرى حنينك مشى قافلته؟
جبروك و طفيت و واهسك وياي
كفرت بكل شي بعدك و العشگ صمته
على برد العطش و تبدى وجهك ماي
على كل حال گلبك روحي عاذرته
عدت مشهد ضحكتك بس لگيته رماد
طفى وي غيري بس بوجهي طشيته
وعليّ يفتل غرورك مو عشگ دخان
والعذيبي اليهب عطاب سويته
هواك لشمعتي سولف بطول الخيط
شعل روحي و حنينك بية طفيته
اختنگ ليلك براسي و ما تنفس طيف
وفجرك هوى يمرني و ما اشتميته
اثر طعنتك زنجر و الخناجر بيض
عكس گلبك وياي الما صفت نيته
انا دمعة غريب بكل سهولة تطيح
جدمي لذكرياتك ليش وديته؟
فراغك و الگبر يتشابهن بالعين
منو المنهن يعيش بروحي وصيته؟
بظهر كل من يمرني تسافر الدمعات
بس انتَ عليك العمر بديته
اذا تمشي بخيالي تعثرك اللحظات
البيهن جدمك وية الغير مشيته
بعد لتودي طيفك ليلي ما بي شوگ
اجاني و باب جفني بوجهه سديته
انا من الورد ظليت اضم الشوف
لأن كلش يشبهك ما اشتميته
بخيم صدري الزعل عطّش هواي حروف
حچيت و ماي وجهك ما اندليته
الك چنت التفت و ادري انتَ ما موجود
اذا ببالك حرف من اسمي عديته
بعد ما التفت لو سما بظهري تطيح
حسبالك گبل؟ لا گلبي چويته
گمت آخذ نفس و بريتي ينزل غيم
واندليت علتي و جرحي كضيته
روح الهوى بظهرك و الهويته يروح
مو بس شوفي عنك سمعي غضيته
گبل ليلك و خلگي تسابگن بالطول
العليّ ما كفى هسة بروحي كفيته
انا بخد الندى تلگاني طايح ماي
وصوت النفس يصهل بإذني خليته
هوى بروحي من اطلعه الموتى يتنفسون
بس عاندت روحي و بيها ضميته
مشيت و خيط واهس چلب بمگفاي
ثگل مستحاي و جدمي هميته
روح اترس فراغك بالبرودة البيك
انا وجه الشمس بالملگى غطيته
برگبتي شگد عطش و امشي على مجرى السيف
واحاضنهم صدگ ما بينت ثلمة
يجون رماح بية مگابل يطلعون
ملوحتهم بجرحي تمشت بهمة
تارسني العطش و اضحك بواهس غيم
المطر مرات هم ما ينحسب نعمة
فاهي الليل يمهم حتى ما بي لون
ولا بي طيف يرهم عالجفن رسمة
ماصخ مستحاهم و انا مالح طيب
اليتبدى وية غيري بروحي ما المه
بيها عناد روحي وية الهوى من يفوت
اذا يثگل عليّ لو اموت ما اشمه
اندلوا دمعتي و عرفوها وين تطيح
يبللني الزعل و اتنشف بكلمة
دمعتك باردة يگولون ما تشتاگ
وانا خيالي الحنين يثگل بجدمه
والگاهم فراغ منين ما احط شوگ
الأحبهم مو نهار گلوبهم ظلمة
اليضم عندي هوى ما اسولفه لمخنوگ
اليجي بوكته دمع بعيوني ما اضمه
واهس ليل جرحي شگد سوالف بي
عليه كل ذكرى مرت تنحسب لچمة
هوَت روحي و هوَت بس ما هوَتها الناس
حچي عيوني سهل بس جيب الي يفهمه
واجيهم و الگى بيهم حيرة متيهين
يطفون و طعنهم بالظهر يلمع
واحضرلهم عذر و البس ضحكتي ثياب
يجون موادع و ملگاي يتجمع
يروح الليل يگصر من تنام العين
يترسني الظلام و جفني ما يقنع
واتنفس دربهم و اشهگ الخطوات
واني ادري بجدمهم بية ما يتبع
ببلمهم ما مشوا لا جفل منه الماي
ساكن ما يحرك گطرة ما يدفع
واطش صوتي نهار بمگبرة عدلين
واخلي الما يشوف على الأقل يسمع
انا المثلي جسر من الشمس للگاع
اليعيش بوطن روحي من الصعب يطلع
وانا لصاحبي افزع گبل ليطيح
مثل فزعة تراب بطگة المدفع
زعلانة گالوا لا تمرها بحلم
وگلولي دمعچ عالجفن ما عثر
اشتموا فراگچ بية من سولفت
مريتي سيف و صار خلگي نحر
يضفرون وجهي و تنّثر عزتي
وبعيوني تطفى وجوه كل البشر
شخليتي بية و صدري فارغ طلع؟
شعاف الندى من آثار فوگ الصخر؟
دبريلي ملگى بروحي وحشة حضن
شگد ناس صغرت من فراغچ كبر
شجريتي مني و ما انجر النفس؟
ظلت النسمة بروحي تطبع اثر
رحتي و خيالچ لا غفى ولا مشى
لا عاف روحي ولا بعيني استقر
اربع مواسم ظل خريفچ يجي
وطاحت ملامح وجهي مثل الشجر
كل خطوة رية الگاع تاخذ نفس
وانا اختنگ لو مني جدمچ عبر
بشباچ وجهي شگد رسايل بقت
محد قراهن چنت الوم القدر
خيّط عليه الليل وجه و گفى
ويعثر بنيته الگدّر و ما گدر
وديلي كل شي الچان من ريحتچ
مشتاگلچ مرسى و شراع و بحر
ما غسل وجهه من الضوة البي تعب
شگد انعكس بالماي وجه الگمر
ذكروچ يمي و دمعتي استعجلت
هزوا صفنتي و طاح وجهچ تمر
الترسوا عيوني ملاگى ما بينوا
ما ادري من عفتيني بية شصغر
عيني بگفى اليرحون صارت وشم
خطواتهم ظلمة و ضواهم گصر
يعرفون جرحي الحبوا و فارگوا
ويدرون جفني شچم حلم بي خسر
جمرة بخور الذكرى لمن تمر
تورّث حسرتي و بية تمشي بحذر
الصبخة چنت ارويها من گصتي
وتشابه بعيني العطش و المطر
ذيچ انتِ و اني بغيبتچ مو صدگ
تعبتي جدمي و ساعتي من السفر
بي حيل هجرچ و انا وشلة خلگ
ذبّلن وجهي مناطرچ و السهر
يعجبني ذوقچ مثل ذوق البلم
متعافي ياخذ راحته بأيّ نهر
نتشابه انا وياچ من نفترگ
ويختلف وجهي و روحتچ بالصور
اليحب من طرف واحد ما يكفي ليل
رمشه بكل حلم من يخطف يشده
العاشگ يختنگ لو طاري فرگة يفوت
الهوى الما مر حبيبه بريته يرده
وين يضم فشلته اليحب من بعيد؟
الدمع عايف حچي و سوالف بخده
ما اعرفچ و چني مفارگچ عمرين
واسبّگ للهوى البي عطرچ تعدى
يبس حضني اريد اتلاگى وية الغيم
البي حرگة العاشگ گلبه شيبرده؟
انا من اشتاگ اخضر بالدروب احضان
السهر عيني علگ شديتها بزنده
شيجي منچ اتلگى الخير و المو خير
شتخلين يرهم و اطلع بگده
حسبوها الشماتة و گالوا من تروح
وجهها و بابها و حتى الهوى تسده
اگضي الليل احضر بالحچي لملگاچ
وخلصت النجم و چفوفي بالعدة
واجيت امشي نفس يم رية الغرگان
گالوا جدمه خانه يروح و تصده
مدري شچم شتة يضيع برجفتي وياچ
ضگتهن بيچ بس حرورتچ وحدة
رديت و فشلتي مخيطة على الگاع
ومي وجهي خلص من كثر ما ندّى
من احضن صورتچ يم شلب يشبع ماي
ولحد خصر النخل دمعاتي تتعدى
انا و شط العرب خوان محسوبين
بصدري شچم بلم هز حسرتي بمهده
وارجع و اشتكيچ بكل وجه بردان
يا هو الما گلتله و كزبرت جلده
گالوا ترس اذاني "انساها ما تهواك"
لتسوي الصنم بإيديك و تعبده
اضيع هيبته من اوگف على الشلال
واوصللچ و كل شي بروحي يتبدى
وارجع ذاك الأول البي الفشلة شراع
بارد چني ملگى الماي و السدة
الندى الما يفتهم يوگع بصف الماي
واليندل مكانه يطيح عالوردة
حچيك چان مثل اسراب الطيور
تجي برودة لسانك و الحچي يطير
ونقطة ضعفي چانت كل شي وياك
شيجي ببالك يهزني وياي لتحير
صرت منخل گبالك و الهوى وياك
واچذب لو طعنتك ضامها ببير
انا الشجرة الگبل بأغصانها احساس
وعليّ هدن ربيعك و المناشير
بعد بية مجال و بيك طعنات
گدها و عالطعن ما بيك تقصير
اورّث ذكرياتك و اشرب وداع
كل ما ادير وجهي و وجهك تدير
بالموادع بروحي يصير تابوت
وبالملاگة هلاهل دمعتي تصير
اكلت ملحك بجرحي و غزر وياي
واكلت سنين عمري و ما مضن بيك
الله انطاك عمر و عشت وياي
وي غيري شتظن هم الله ينطيك؟
جنطة سفر دمعي و ماخذه وياي
خلص بأول محطة گبال طاريك
عليك مخلي بالي و خاف فد يوم
تبرد بية حاسب بيش اغطيك
انا موصي الجروح يلبسن ثياب
مو لأجل الستر بس خاف امر بيك
اكو حضنة ملاگة و حضنة وداع
يا هو تريد منهم من الاگيك؟
خلص ماي وجهي شطلعت وياك
واگللهم چنت عطشان اوديك
ارسمك ملتفتلي و تطلع اوهام
ملامح وجهي ما فهمت معانيك
بثگل جرحك گبل خطواتك وياي
شني شو عالزعل خفيت رجليك؟
من اذب حسرات انشف حرورة الصيف
هيچ وياي وصلت من اسميك
من اكشف جروحي هيبة گبال الجروح
بكثر ما مشن چنت بروحي امشيك
مطر غيم انتظارك يبّس الروح
ونهر ملگى اشتهيت بروحي ابديك
الما يندل خيالي بروحي ما اخليه
وما يرهم عليه لو نفس جيته
التعداني بحلم يلگاني عابر ليل
الفجر گبل الشمس بعيوني وشّلته
الما يشتاگلي ينترس حضنه فراگ
على الملگى من اسولف ما تذكرته
بيها وداع روحي يكفي كل الناس
وخسرها الچان ظنه الروح خاسرته
اليحبك من صدگ لو سهم يتلگاك
شيلمه الگاع تصغر لمن تودعه
اليصير مرايتك يندل حسرتك وين
ويعرف وين بيك مچودرة الوجعة
اليضفر حيرتك بچفوفه تلگى اعذار
الحنينك بي تطشر يگدر يجمعه
اليطفى گبال وجهي انطيه عذر ينشاف
ما خليت نسمة بخاطر الشمعة
انا الضايگني يعرف طينتي من الهور
بية ملوحته و ما بدلت طبعه
واتلگى اليجيني منين ما يشتاگ
اليمر عابر عليّ من روحي ما اطلعه
لعدوي و صاحبي تغبش ضحكتي وياي
اليجي سيف على نحري استحي و ما ارجعه
افرزن ريحتك من يا درب مريت
اليجي مشتاگ يثگل و الهوى يدفعه
اختصر كل شي و اطول من اريد انساك
واحس كل صبح بارد وجهك يتبعه
واشمك شمة المهضومة عالمكتول
غريبة و بس تريد من الدمع فزعة
وكل مغرب يمر تترس شليلة عتاب
وحچيها يظل اثر بچتاف الي يشيعه
وتنده كل گبر بي حسرة عالكتال
ودمعها من التراب الغاطة يفرعه
تشرب كل فجر يوصلها ما بي طيف
ويفز كل شي حنين وياها من تنعى
بروحك چم سما و ما غيمت وياي؟
عليه تزخ عطش و منشف السبعة
ادورلي نفس بوجوه غرگانين
كون بگد هواك و غيرك يزرعه
المفارگ مبين عذره يمشي وياه
الما بي شوگ طافي العشگ بي لمعة
بگصايب يا حلم شديت روحك خيط؟
خيطك من يمر دخان ما اگطعه
ثگلت بروحي جثة و ما لگت جناز
وخيالك گمت اشوفه منين ما اضيعه
اليسافر للبچي ياخذ عيوني متاع
على جفني ولام جاية مخيطة الدمعة
اليفارگني شبر ابقى التفت له سنين
واتاني بكل جرح يا لچمة الترجعه
انا من الحچي يبللني طاري الماي
ويمر اسمك و ينشف خاطري بسرعة
عليّ بردت الدنيا و بعده وجهك حار
مشيت و بية ضاگن صدري و الوسعة
رد مع اقتباس