اعود من حرب الدموع مبللاً
لأرى انتصاراتي بدونك خاسرة
متكاسلٌ عن كل حلمٍ فاتني
متجردٌ من كل ذكرى عاقرة
امضي الى اللاشيءِ أجهلُ غايتي
ومشتتٌ مثل الوجوه العابرة
في كل مشنقةٍ تكون قصائدي
وكأنها في نزهةٍ و مُسافرة
كم كنتُ احتضن الضياع و انحني
متوسلاً بالعفوِ عند المقدرة
بقمة ضياعي چنت محتاج عنوانك
ومن صار ظلمة العمر حنيت لألوانك
ما مقتنعلك رحت...
من احس روحـي طحت تلزمني قمصانك
انا اليعوف الهوى على حساب دخانك
اليفتح چفوفه الك من تسد بيبانك
شيفيد بية البعد...
من افقد الذاكرة يذكرني نسيانك
حاير و احس بخطر حيرة حمامة بمطر
لو ما لگيتك وطن ما ظال بأغصانك
ما حاولت تلتفت؟ تفتقد حنيتي؟
مو چنت كل شي الك...
لميتك من الهوى و ضميتك بريتي
ذاك الإنطيته الك مو وقتي عافيتي
چنت بوجودك قوي و مكتملة شخصيتي
ومن راح خوفك گلت راحت اهميتي
چا هاي تاليتي؟...
تبتعد عني بسبب حرصي و انانيتي؟
تتخلى عني بوقت تعبانة نفسيتي؟
مو كافي تضحيتي؟...
كل شي امتلكته الك و اولها حريتي
ومن تالي صرت انحسب سجنك و سجّانك؟
من بعد ذاك الوفى تشوفني خذلانك؟
المهم خصم الجرح...
منا و جاي انتهت من گلبي و لسانك
ذاك الفراغ انملأ و غيرك خذه مچانك
ما اريد ترجع بعد هزيته فنجانك
في امان الله من بشر ما زعلك مرة
كلما يغثك مطر يوگف الك شجرة
وبأول دعائه چنت لمن يطب حضرة
في امان الله من بشر ما تعب عيونك
تلگة بلهفته حضن من يكتب شلونك
وكلما يلوحك تعب دگ ايده بمتونك
في امان الله من بشر يوگع قبل دمعك
انسان قبل الحچي يحس بيك و يسمعك
و چي تنتقد بي چنت عايش حسب طبعك
المهم لا تعتقد لجروحي ينسنّك
ولا تحچي عني ترة ما حاچي شي عنك
لا تستفزهن ترة دمعاتي يآذنك
ودعوات امي الي باچر يعثرنك
من يحتويني البچي و يحضن السكتة الحچي
چنك ولا چنك...
وتسألني "شو مختنگ؟"...
هو انا صح مختنگ بس مختنگ منك
اول ما التمت بيننا الصدفة
لگيت شگد عرف بعيونچ تخفى
ركض واهس الضحكة التارستها الآخ
الحلقة الغاصبيها تبهذل الزفة
و انداريتي بس دنيا العشگ فرجال
شما يندار روجچ يعثر بضفة
بالك يا طعم صيادك يهف بيك
و حدك يوصل من الهفة للشفة
اول ما عشگتچ دمعي ما كفى
و فنها جدامچ على جروحي تتحفى
التقينا غيوم و دروب المطر نشوة
و تشابگنا دمع من نشفت الخطوة
انحچينا ذنوب و استهلكنا چم شيطان
المري من تنكسر ما ترجع بفدوة
استقرينا بلم و آخر حضن عالروج
بعد حسبة سما و تخدرني بالگوة
المهم مشتاقلك من هوى و كوخ و ليل
فل ضحكة عيونك و انعگد غنوة
التذاكر غالية و سچة قطاره انسان
و قوافل سندبادك عطش ما تسوى
تعال اعزف گذلتك خل تغني الريح
الموسيقى بلايا صوتك تشبه الگهوة
وكت خلى الغرب تسألني عنك
يا ما تدري شكثر مغثوث منك
متيه وجهي من تشوف الوجوه
عرف, و الحلوة ما شايفني چنك
شكثر شايل لك وما شايل عليك
جروحي استغربن من باوعنك
قبل لا رايح اتذكرهن وياي
العطش كسرة وجوه لسمعة الماي
چنت غيمة و ادور يمك فياي
رحت و دموعي بفراگك قرنّك
يا المبتعد عني ابتعد مني
شثگلهن ذكرياتك تعبنّي
كل شي بيك يذكرني مرات
بحيث هدومي بعدك يوجعنّي
عفتك و القصايد رجعنّي
ما معقولة صفناتك نسنّي
چنت لك زين و انتَ بكل شي مو زين
مليت عيونك و ملّيت مني
شيبين بيك؟ شو ما شاء الله بخير
يومية على عشك يستقر طير
هضيمة اتعب و اربي لخاطر الغير
شايف من تفارگ و انت لسة تغار
ويصفن بيك لونك و الهضم يحتار
من يروح منك و انت بعدك حار
شيطفي ابراهيم جروحك...
شايف من تگله انتهت بالحسرة
وتجبر دمعتك بس حيلك تكسره
وتضيع اخباره بس تتمنى لو گبره
بلكت نفس ترابه يدفنك...
شايف من تگله الله يعوض الراح
وبگلبك حچي بس انتَ صوتك راح
من تثگل چلمتك و الجرح ينلاح
تخيل تابوتك بمتونك...
شايف من تسألك امك "شمالك؟"
وتگللها راح, تگول "هنيالك"
يبنيّ العشگ مرات چتالك
وتگلها شمدريچ عايش...
شايف من تحس غيرك سكن گلبه
هنا تغار, تموت, تبچي, المسألة صعبة
بوطن حضن امك و متروس بالغربة
مسكينة امك بس تلولي...
شايف من يگلك رايح اتزوج
وتطفى الدنيا بيك و دمعتك تنوج
الگاع تحسها مرجوحة على متن اعرج
وتگول لضيمك يسترسل...
شايف من تعوفه و تگعد من النوم
ورمضان الحچي گاضيها بيك يصوم
زين من ما بيك تحچي شلون بيك تگوم
ينراد لصوتك عكازة...
هسة شفتوا؟ هذا الصاير بحالي
ابن گليبي شفته يصير مو مالي
ابن گليبي شفته يصير كتالي
الغالي العلى ساعة و صار...لا غالي
بس اني اتونس بجروحي
الليل جاباني الك لو انت اجيت
وفززتلي سنين چانت غافية
وفزعن مفرعات و يدورن عليك
بلا شعور اجدام تركض حافية
صورتك لسة بخيالي و من زمان
وچني من هالساعة شخصك شايفه
تزعل و عني تصد تنطي گفاك
ابقى احبك ما اگولن عايفه
بين رموش عينك و السواد لگيت
حچي مخنوگ يتنفس هوى الميتين
يرافس شوگ شايب بالخجل مچتوف
يزفر "آه" يتذكر هوى العشرين
بخيط المستحى عاگد حجاية الروح
خاف الحچي يفرع يصبح سچاچين
اريد انعى الشباب بصوت شايب عود
بونين و حزن و ببحة تنزف "آه"
لا ميت و اگولن ابچي ساعة عليه
وجرح فراگه يلتم و الگلب يسلاه
ولا غايب و اكض شباچ ابو الحسنين
واطلبه مراد منه و حتى اظل اتناه
انا مضيع عمر باگته مني سنين
ادور جيوبهن بلچن عسى و الگاه
ينوي على الرحيل و ينطي مگفى فراگ
واخذ كل شي الإلَه من بالي حتى انساه
بيا بخت الأجيبه و ساعة ليَ يعود
وترد ايامه ليَ و اگعد انا وياه
حدّب كل شيء بية من السمع للشوف
وصرت معبر همومه و گنطرة لممشاه
من تجر عنانها تبين هذيچ
كحيلة بنت كحيلة امها مأصلة
ما تدنگ شامخة تلاوي الرياح
الموت من يجبل عليها تماطله
مهرة و يبين طردها من العناد
تعاهد الخيال كون توصله
مو مثل بعض البعض تنقض عهود
الخوف ياخذها و حچيها تبطله
شنهي احط عنان لو رايد اروز
وهيچ افرع هالزلم المعگلة
حتى اشوفن يا هو مربوط بلسان
ويا هو چلماته ويه عگله مرعبلة
الينهزم جدمه ركض لا گلبه خاف
يموت ما يلحگ عليه الي يگبله
بالك تأمن حچي الما عنده طول
الطوله خنجر حچيه تلگاه بگفاك
بي طبع يغدر و إن حسبته اخوك
تطعمه بإيدك و هو ايده بأمداك
يضحك بوجهك لچن بي گلبه لا
مشلل حچايات يرميهن وراك
يطوش مشيك تابعك شايل شليل
يلگط العثرات متتبع خطاك
انكسر مجداف عمري بزحمة الروج
ووگف بيه الزمن يم الي يكرهون
وخفت همي تكشفه اسرار العيون
خيطت النظر عن لا يشوفون
وخفت حيلي يحدب يكشف العوز
ظهر شديت صبري لشيل المتون
وخفت شماتي تصرخ "اي وگع طاح"
وگفت رمح على جرحي گبال العيون
ولجمت الجرح لا يصرخ ب "آخ"
وشلت صفنات روحي و چلمة "شلون"
حلبت در النوايب روبت راي
غموس الحال روحي و صبري ماعون
اكلت منه و رويت و بالي مرتاح
الشبع شبع العَگْل مو شبع البطون
ومن دمعي خفت لا يسولف الحال
وَشلت الدمع من بير العيون
ببطر غنيت و ارگص و انا بالموت
رگصة طير بإيدين اليذبحون
لأن عندي امل و الغايب يعود
واتنطر فرج من صاحب الكون
على ساعة و يفر الوكت دولاب
العالي يصير ناصي و يصعد الدون
جرح شلتك بروحي و ما گلت مليت
اون وياك اكاسر ونّتي بونتك
مشتاگ للچمتك حتى احسّن بيك
شوگ الفاگدة الملهوف اشبگنك
غالي بگد غلاة الشوگ للولهان
اخذ عيوني مني و خل يشوفنك
سولة بواهسي مشغول افكر بيك
يمكن ها اجى ها راح ادورنك
اتعنى لمچان الي گعدته وياك
ما الگاك بس رايد اثر منك
بلچن چلمة ظلت ما نگلها الريح
الگاها و تجاوب بالنشد عنك
لو ادور عطر منك بقى على الگاع
احط نفسي عليه و بس اشمنك
جدامي من النشد دوخن راس الگاع
يدورن اثر منك بي يتبعنك
عگدة براس فكري گُلي احلها شلون؟
أأيس لو اظل للموت انطرنك؟
لو اجمع صفنتي و انت بيها تصير
لحظة وياك اعيشن كافي احسنك
وبلا موعد لگيتك صدفة لعبة دور
جابتني عليك تريد افضحنك
ولگيتك انت لچن موش ذاك الچان
وحتى انت الي بيها مو شبه چنك
واحس گلبي انتفض دگاته بيهن غيض
ودردم چم خرز دار الوجه عنك
ونزعتك ثوب ميت طول شگ الزيج
وشطفت ايدي اخافن بيها اثر منك
رد مع اقتباس