بيني و بين نفسي شگد افكر بيك
اگول شمعنى انتَ الشاغل ظنوني
مو اول عشگ خاطر تشل الحال
ولا اول جمال تشوفك عيوني
شجاها الروح يمك ذبت الاسرار؟
وليش ارجف عليك و ينخطف لوني؟
وحتى الناس گامت تعرف بهالحال
ما اعرف شگلهم من يسألوني
يطبون بصفتني و عنك يدورون
ويلگوني افكر بيك…يلگوني
صاحت كلها صاحت "هذا هذا فلان"
ما عندي لگوك و بيك تهموني
اتهموني بمحبتك والله لو يدرون
بالضيم العليه ظلوا يواسوني
ما يدرون عايفني بمهب الريح
وانا وياك عفت الما يعوفوني
اليحبوني شكثر و لجيتي يتانون
واخجل من كثر ما گام يتنوني
وانتَ الما تحبني شلون بالله وياك؟
امرن بيك…ما امر باليحبوني؟
بعت الي شروني, و من ارد شلون؟
هم اسوى بعد و النوب يشروني؟
حبيتك شجاني و ما حسبت حساب؟
خيعونك عليّ…مو انا خيعوني
ما تحبني و احبك و المصيبة النوب
اريدك و انهزم من اليريدوني
ومن دونك صرت ما اعيش وية الناس
وانت بكل سعادة تعيش من دوني
بأحزانك اودي عيوني تبچي وياك
وبأفراحك ابد ما تذكر سنوني
من سمعوا اهلنا العشگ دگ الباب
ما خلوك اهلك...اهلي خلوني
ما خلوك اهلك...حقهم يخافون
بس اهلي بمحبتك شلع باعوني
رد مع اقتباس
