موضوع شيق جميل مثير
شكرا للطرح الرائع يامبدع
موضوع شيق جميل مثير
شكرا للطرح الرائع يامبدع
تأخرتوا علّي...طولتوا يمه
قلقتوني شنو الشغلة المهمة؟
مو مشكلة احچولي شگال ما گال
اشم بثيابكم ريحة مذمة
صرت ماضي و نساني و ما اهمه؟
انتهى كلشي و يريد ابريه الذمة
انا تخونني ذاكرتي مرات
رحمة لوالديكم هو شسمه؟
حسباله يجيني الخبر وانهار
سبع سنين اظل عايش الصدمة
امشي على البحر اگضيها صفنات
احب ضي الگمر و تحبني نجمة
واشخبط عالرمل و ابني له ثمثال
واظل ابچي و تجي الروجة و تهدمه
ويملّون اهلي من الاطباء
يتجهون بية على الأئمة
خطية هواي يحلم رايح بعيد
وفرق ما بين حلمي و بين حلمه
حلم مرة حلمت چني امشي وياه
بحلم زرت الحلم گصيت جدمه
ناصب له مشانق حتى بالبال
بس يخطف علّي طاريه اعدمه
انا و ثم انا و كان من كان
اصبعين على روحي ما اقدمه
گلكم عافني و يرجعلي هيهات؟
چا شمتاني ميسويله همة؟
انا البايگ ضواه خلي سنة يغيب
وترس ريتي هواه ما حاجة اشمه
السواه سوى غيره هواي عشاگ
وينتظروني أأشرلهم لعلمه
بس هو صدگ ما گال مشتاگ؟
لا يشتاگ مو فد...هي قسمة
شبيها عيوني يمكن لاحها تراب؟
ما باچي عسى بهاللحظة تعمى
خابرته شوكت؟...بالغلط دگيت
مرتين و طلع خارج الخدمة
من يمهم فتّت...اي يعني و شصار؟
حضرته المنطقة مسجلها بإسمه؟
وگفت ببابهم...گلوله غلطان
وگع مني دمع دنگت المه
ولو طالع مسلم ما احاچيه
بس بگلبي اگول الله يسلمه
تتوقعون اريد اتصالح وياه؟
بشرفكم تالي عمري اكسرلي كلمة
ششايف روحه اتنازل و اراضيه؟
اذا راضيته اگلكم وين اعزمه؟
انا الخوش زلمة و ما اطخ راس
لكن بالعشگ مو خوش زلمة
اعلمك لا تهد وياك نسوان
ترة زحمة عليك و هاي متلوگ
و اعلمك لا تظل تركض ورة الناس
ترة اسمك ينّسي و تتسمى لاحوگ
جبل صير و عليك جبال ترتاچ
ابد لتصير باب و كل ساعة مدگوگ
ترة اليمشي بدرب اظلم يظل بيه
و الينفتگ زيجه يبقى مفتوگ
و اعلمك صاحبك لا لا تزلغه
طيب صير ابد لتصير حاروگ
و اعلمك لا تظل ابيض گلب دوم
اللبن نفس البياض و كل ساعة مطروگ
و لتعاشر بشر ما تعرف اصله
ترة المر و الحلو ينعرف بالضوگ
مو بس الگصب ينشرگ بالدوس
ابن آدم گلبه من الدوس مشروگ
الي يسويلك فضل لا تنسى فضله
خلي الفضل دين برگبتك طوگ
و بطّل لا تظل تشمّر حجار
الناس چفوف عندها و يمها طابوگ
انا الثوب العلي كلش حلو ليش؟
لأن ما اريد اهد و ثوبي مشگوگ
مو مثل السطى على الناس بالليل
و رد لبيتهم لأن بيته مبيوگ
شلونك ب الي يخيط جرحه بإيده
و ابد ميصير لگمة بكل الحلوگ
انا الما اريده گلبي ما يريده
و إذا رف گلبي اشلعنه من العروگ
بعد شتريد اعلمك؟ گُلي اعلمك
الجرح ميطيب إذا ما يبقى مطبوگ
علمتك شچم سنة؟ كل يوم اعلمك انا
و ما اخذت مني درس
لو جبت ماي البحر و غطيتني بالشجر
هم ارد و اطلع شمس
الما يريدك ربح لا تشتريه بفلس
شتنظف من النذل؟ شما تغسله نگس
گلبك إذا طاوعك لتصير وياه نحس
خليك مثل الشمع تحترگ و تصب دمع
و بالظلمة ما تنحبس
ثگلان حتى النفس مو جدمي بس ثگلان
وتعبان مو من حمل من الوكت تعبان
بعيوني لمعة دمع
و منين ما التفت...الگى العمر ذبلان
والحيرة ما تنوصف
لا جرحي طاب و تفض لا ميت و خلصان
وعزاز ياما مشوا
واحد مشى بضحكته و واحد مشى و زعلان
وانا شگلت و انكره؟
يا ربي اگطع رزق بالدنيا كل دفان
وكون الوفى ينباع بالسوگ
وكون ال"شلونك" مو حچي حلوگ
شگة كواغد گلبي مشگوگ
ومو من الهوى من الوكت مخنوگ
يا هو الي يشيل الحمل عني؟
وجوه الي نسوني يوجعنني
مرة ابچي و حدي و مرة اغني
وما صح لي واحد يفتهمني
ما ثگلت وجهي على الخطاطير
ولا صدگت بالي گالوا تصير
ويامن اعيش و تنفض بخير؟
والعمر يوگف بالتصاوير
مو بالغصن بالعرگ مطگوگ
ومو من الهوى من الوكت مخنوگ
ومحد غاثني بس انا مغثوث
واحس الروح تطلع والله مرات
واجي لگلبي اگول يجوز بي صوچ
ونظيف الگاه مثل گلب الحمامات
لعد ليش اختنگ بأوقات الغروب؟
وادور حجة حتى ابچي لي دمعات؟
وليش بصدري احس صياح مخنوك؟
وليش لوحدي و متروس زينات؟
شكثر گايلها بس جيب الي يصدگون
خيعونه الي خلص من دنيته و مات
الحمد لله إذا على العافية بخير
بس بنفسي ابات بلايا حسبات
يجي الليل بسوالف ما ادري منين
اشكال يجيب لي و يترسني حسبات
مرة اضحك و اگولن فرصة و تروح
واتاني الثانية تعوض الخسارات
واتاني الثانية و تمر السنين
وارد اندم و اگولن لا حرامات
المهم يا هو الي يعرف شبية و ارتاح؟
انا مو زين ساعة و زين ساعات
يا مذبّل جفونك خجل يا الشفّتك مرطوبة
خايف عليك من اللعب لا تنكسر بالطوبة
وين الصبح ما بيّنت من علّمك هذا الصد
تنساني و انا الچنت اطگ سن على سن من تبرد
واتمرجل على العاركَك و انغر صدگ و اتهدد
يا واشي هذا الغيّرك يا ابن حرام الأيّد
هسة صدگ هسة طلع حچي العشگ مو مُسند
عمي على كيفك يا حلو يا اشگر يا ابو خد و خد
يا مطرّزة عيونك شذر و مترّسة خدودك ماي
مو گتلي امر بيك العصر شو هسة ليل و ما جاي
اتمنى خير الأخرّك لا شدّة كون و لا دَرَك
تدري على هالساعة انشرگ عقلي و صفيت بلا راي
مو گتلي امر بيك العصر شو هسة ليل و ما جاي
عنّك حچوا ياما حچوا گالولي شو بيه مهتم
گلتلهم ستوني شفت شفة جلد تحت الدم
مرهم تگول لكل جرح جوري و عليه گبصة ملح
حگي من اشوفنه انشرح و اضحك و اسولف بهداي
مو گتلي امر بيك العصر شو هسة ليل و ما جاي
يا الدولبت فكري و همّت بيك و تحيّر بالي
شنهي التغيّر بالعجل تضرب گمت بالعالي
زل و اعتذر مو مشكلة باچر يرد كل من اله
الحب و الله محلله قابل تحرّم وياي
مو گتلي امر بيك العصر شو هسة ليل و ما جاي
يا مذبّل جفونك خجل يا الشفّتك مرطوبة
خايف عليك من اللعب لا تنكسر بالطوبة
العب تعال على الگلب والله الك دوم الغلّب
اسمك بعد ما ينشطّب ختم بحبر فوگ چلاي
مو گتلي امر بيك العصر شو هسة ليل و ما جاي
نامت حبيبي و ايّست وادم تأخر خلها
وانا بكثر ما دوّرت كل الدروب اندلها
اعرف لهسة ما نمت گتلي الخميس و للسبت
گلّي بكتّر ما دوّرت تگدر تدوّر يا هواي
مو گتلي امر بيك العصر شو هسة ليل و ما جاي
التعديل الأخير تم بواسطة Pixie ; منذ 6 يوم الساعة 5:26 pm
احرگني گتله حطب بية ادفى و انا احتمل
وكيَّف حرگني و دفى و طفّاني بعد الحرگ
گتله ضميرك صحى؟...لا گال اريدك فحم
مرتين راد اشتعل...
الخوة اشتريها لگط لو تنغلب بالسعر
لا تشتريها عزل
طبع السعادة دهن و ماي انا ما ننجمع
شما ننخبط ننعزل...
والفرحة طير بغصن سهام الملامة و هلي
وعداي و المستحى...معقولة ما تنكتل؟
والخلّك شعره صفى و اقنعني ما تنگطع
بين الخبل و الخبل...
وهمومي نار بگطن اطفيها من هالكتّر
بذاك الكتّر تشتعل...
وبروحي لكعة حزن من ابتسم ما تنمحي
وبالماي ما تنغسل...
بعكّازة اشوف الدرب المرود كسرته بإيدي
والله استحي من الكحل...
امنيتي اظل وحّدي البدوي حياته تعب
ضيم و سموم و عطّش...بس المهم منعزل
الّي يطب معركة و يطيح وسط العدو
ويموت موتة شرف...خلي الجسد ينسحل
اشلع ما اسّد و الغيهن الفتحات
الچانَن بوّب امس ما اسدهن ابنيهن
والزمهن سرة باب العدل و الطيب
التسامح و الصلّح...اولهن الغيهن
الحصلته شنو من چانَن مشرعات؟
يكثرن بال"هلا" و ينطعن راعيهن
الملح ما دنگن له عيونهم وكحات
شبية و وين وجهي الگهوة تثنيهن؟
الزم له الدرب لحد ما يجي الدوّار
الگمگم و الدلال گبالي اخلّيهن
وما الزم سعر شرّاي مو شرّاي
ابد ما اعامله شينطيني انطيهن
الإيديه بموگده يگلّب بچفه النار
كل عقلك يخاف رماد تچويهن؟
صم حنطة و شمرته و الحمام آلاف
خاف ارجع و المهن وين الگيهن
افرّط بالغنم ما فرّطت بالخيل
فوگ الغيم چنّي من اصعد عليهن
جعت ما جوّعتهن و الزمن مضمار
بكل جيل اليجي يصهلن قوافيهن
شيعوضني الدمع و انا الخسرته هواي
وعلى رملّة امل كل عمري وشّلته
انا الباگوا نهاري و رحت ادوره بليل
وبالمسودّن طبع ما يعوف سالفته
على نفس الدرب ذبّوا لي بس الصوف
حتى ارجع و اگول ذياب ماكلته
وانا الما صبّر و العطّش ما وازاه
دنّت نفسه و ذبح بالصحرى راحلته
گلب ما چنّه گلبي چنّي متبنيه
جرّعته التعب ما يوم دللته
طفل من إيده اگوده و هو يمشي وياي
وعلى ضحكه بكهف للموت نزّلته
انغلق باب الصبر گدما ادگ عليه
مو خالي كرم بس انا مللته
بعد ما اهد سهم كون الطريدة بعيد
ما بيها فخر لو اگول وصّلته
شلت راسي و شفّت بالشجرة عش محروگ
گلت هذا السبب و الحرگة كاتلته
ونفس موته متت و الجسد بعد الروح
وحسرتي بچفن و بدمعة غسلتّه
سل سيفه الزمن "هل من مُنازل؟" صاح
اعزل ما خفت و الزمن قاتلته
صح ما لحته ابد لكن ملّاني جروح
بس عندي المهم ما عفته قاتلته
بسّك يا ضمير الصار بية هواي
بسّك هالعمر ما يوم جمّلته
يا روحي الإيده بجمّر مو مثل الإيده بماي
ملّيت من الحچي الذيب غط الغنم
والراعي يعزف ناي...
بفنجاني تقرأ و قرت ضيم و مآسي و تعب
گلتلتها هذا المضى؟...گالتلي هذا الجاي
وصحراء تگضي البقى بس الرمل و الشمس
ما تلگى بيها فياي...
گتلها هذا البشر بصرخة ابتديت العمّر
وصرخات من ينتهي...و محد يروح وياي
وين الخلل بالزمن؟ مدري الخلل بالبشر؟
محد يفسّر هاي...
الكبّر خياله الضوة ما اشوفه نفس الحجم
غيري ليشوفه هواي...
بس يا الردت تبتعد لا عندي حيل الصبا
وطيحتك مو بهداي...
بدوي على بيت الشعر للبيع ما ينكتب
طبق الأصل حبي الك...ما ابدله بدنياي
وآخر كلامي الك وية الحار حار انگلّب
وية البارد ابرد بعد طبعي القديم انتهى
قررت اصيرن ماي...
يردونك تضيع و انتَ نور بليل
وتموت من العطّش يا الماي يردونك
ويضيعونك عجيب و انتَ مثل الريح
وين بيا مكان تضيع يلگونك
مشّوك بدرب ما مات جدمك بيه
وحتّى تضيع كلش شدوا عيونك
وغشّوا عينك و ايدك مزنجلة و مچتوف
تهد هدّة اسد لو ناس ينخونك
يا المغفّي جمر منقلة و بيك تنام
وهمة رماد موگة ما يچوونك
إذا ظلّك طلعته و ظل وراك يحوم
ابد لا تخاف منهم ما يظلمونك
عاشرنا التعب و الآه و الحرمان
كلها لخاطرك و لخاطر عيونك
صرنا لك جسر للنجم عبّرناك
وصغنا من الحزن ضحكات لعيونك
تعلگنا قطع سودة و عليها ارواح
ما چننا قطع لا كحلة لعيونك
يردونك صبّخ و الملح ياكل بيك
ويردونك تبور و ما يزرعونك
ويردونك تجّف و الماي يطلب ماي
ويردونك تنام و ما يندهونك
ما يدرون عرگك بالأرض ما يموت
ترد تحيى و تعيش شما يگطعونك
ذاك حسين حي و صير انتَ مثل حسين
بالشدّة الخريطة تصير ميمونك
يا مدري شأوصفك شأرد اگولن بيك
عراق و العمر ما يسوى من دونك
ليلى انتَ صرت و المثل ما ينقاس
وشعبك من محبتك صار مجنونك
رد مع اقتباس