قصة حزن مؤلمة
عن كل سهم عاش الندم
شلون ابتده وانرمه
والدم ختم فصل الألم
وسهام الثــلاثة..
من حَـرمله..
كل واحد احداثة
اتهز كربله..
***
ندم بالطف عگب ماهدأت الانفاس
كسر صمت الحديد وايقظ الاحساس
نطق اول سهم بس ماتسمعه الناس
انا نابت بعدني بمحجر العباس
اسأل انتـو وين ... يسهمين ...
هل صوب الرضيع ... و الحسين
من جاني بالمشرعة
بعين الگمر
اصرخ قهر
الكل يحچي عن موقعه
رمية خطر
وين استقر
سامع حچي عنكم
بعيد البله
جروح البدت منكم
اتهز كربله
***
انا السهم اللي ريت اخطأ نياشينه
ولا اجرح كفيل امگطعه ادينه
شفت نهر الوفه يجري وسط عينه
شفت داخلها راسم صورة اسكينه
برموشه الأمان ... وطن چان... من صبته انعميت .. بالأحــزان
مو عينه متمزگه
چنها السمه
تمطر دمه
بنور البصيرة بگه
اتحده العمه
ما اعظمه
امنازف دمه وغيره
عالعايلة
وجرحه ترك حيره
اتهز كربله
***
سهم ثاني انتفض واستيقظ الليله
كشف عن موقعه يم خيمة العيله
على گبر الرضيع المدمه ايسيله
ومن كثر للندم امسه يلوليله
يبچي ويه الرباب ... بالمصاب ... يحچي ويه السهام ... بخجل ذاب
يسهام انا اللي اقترف
الذنب الأشد
شحچي بعد
دم البراءة نزف
راح الولد
خالي المهد
اتحسر ودمه
فوگي اعتله
وحسرة قلب امه
اتهز كربله
***
انا السهم اللي ما من عاقل ايعذره
اتجهت اعله الرضيع وما الي قدرة
اذا ريح اليهب ميغير المسرة
اغير نيتي گلت واحب نحره
بچيته وبچيت... تأذيت .. بأقصر مني چان ... شنو اجنيت
ماصدگ اذبح طفل
هذا الجره
من يغفره
بشرع الحرب مو عدل
العالم دره
عن منحره
شرع الحرب خنته
بهالمسأله
زغير لچن ونته
تهز كربله
***
انتفض ثالث سهم من بين الترب والدم
صدگ اكثر سهم من حقه يتندم
مثل جرمه حديد الدنيا ما اجرم
سوه السيف اللي چان بيد ابن ملجم
سهم الليلة گال .. بالأهوال .. حالي ياسهام ... اشد حال
حسين بصحف مقتله
اسمي نكتب
واصبح سبب
راميني چف حرمله
قلبه نشعب
شيبه نخضب
عن جرمي اتحدث
وابچي اله
حروف اسم المثلث
اتهز كربله
***
انا السهم امچان ماينمس
شعاب اثلاثه قلب حسين بيهن حس
چن كلما امزق النابض الاقدس
الملايك بس يالمثلث تگلي بس
ازعجت السكون ... انا شلون ... گبل الرمية ريت .... فنه الكون
حين اخترقت القلب
شفت السور
كلها ابكدر
بصدره وفتحت الدرب
عودي عُبر
حتى الظهر
چم اية تتوسل
بالزلزله
بموعدها تتعجل
اتهز كربله
***
كلمات الشاعر المبدع | علي السقاي
تدوين | Zahraa alobaidi
تحميل استماع MP3
محرم 1447 ه
رد مع اقتباس