يالماشي لبعيد عليلة الكم بالديار
عفتوها چن بيت شعر بي كضت النار
يا راچبن فوگ سباگه الريح
خذ لعمامي وابويه حسين مرسال
گله العليلة تراها انگوم وتطيح
بفراگم يَــحسين مشدوهه البال
************************
عفت بالدار عيني امغورّجة ادموع
متعودة اعله عينك
كلما جاسها بحرورتة الشوگ
تصرخ بوية وينك
تطلبك دين ابوة يبن الاكرام
تعال ووفي دينك
يبو چف الطويل ابوصل الارحام
لا تگصر يمينك
يابلسم الروح تعال وداوي الجروح
العايفها بالدار تريد وياكم تروح
************************
تتعب من تجي ساعات الغروب
يبني الفرگه مُره
عليله وحگها اذا تعتب يمهيوب
فراگ الغالي كسره
صوت وجسم من الاجر متعوب
البعد محد يگدره
وفوگ اجفونها دمعاتها تروب
وتنام بعين حمره
بُعد الاهل موت ثجيل ايحز بالارگاب
يابو المداليل العليلة فراشها تراب
************************
يمضيج اديار العز يمسؤول
رد واخذ الامانه
اخيول الهجر يم اديارنه اتجول
تعبنه من المتانه
لا حاظين بيك ولا احنه ميتين
سبي غيابك سبانه
يبو علوم الچبيرة الترفع الراس
فراگك شيبانه
خاف أعتب اعليك وأزعلك وانتَ متعوب
حال العليلة بغيابك يكسر گلوب
************************
اعله دارك من يحط الطير احاجي
واگله شلون اهلنه
بلكت مار بيكم واسمع اخبار
عن ذيچ المحنه
عساها ابخت طف الشوم يحسين
رحتله وطش شملنه
لا مرسال منك جاي وارتاح
ولا انته الراجع النه
ماراح احاچيك واجرحك خاف أأذيك
تدري العليلة ابغيابك بس تهم بيك
************************
إذا ماناوي ترجع ودي عباس
يجي وحملك يشيله
انا ابقه بديارك ماجي وياه
بس اخذ العليله
خاف اتموت عندي من يجي الليل
عتبكم مالي حيله
شگلكم قصرت وياها لو اگول
امتاناكم تگيله
يالماخذ الحيل هجركم سوطه جلاد
بُعد الاهل نار توجر حدر الفاد
************************
يمزود مرضها بروحتك هاي
تعال الفرگه تكتل
غاليتك ييمه اتگوم وتطيح
كلما شاهدت بل
مامقتنعه ترجع يَـسردال
ولا مقتعنه تقبل
حرت مابين هاي وهاي يحسين
ودمعها عليك يهمل
بُعد الأبو ايريد گلب مامرة مفجوع
عفت العليلة گلبها اعليك مفجوع
************************
للشاعر / مُسـلم المطـوري
تـدوين / zhralobaidi
تحميل
إستماع
MP3
رد مع اقتباس