هنا

[✿ عِشق ✿]

اوتار التكبير .. گطعوها گطعوها
وعيون التوحيد .. صابوها صابوها

آه محتار والوادم غريبــه

آه عطشان والماي اشيجيبه


*********************

ياصُبح قبل الصُبح
تنظر لأطول رمح
بابتسامة

وجهك ووجه الشمس
ياضوه الما ينحبس
للقيامة

ماكو داعي نلتفت
وانتَ من ظهرك شفت
كل علامة

منحني قرب الجرف
شجرة ضاربها العصف
يامه يامه

مو كل دمعة اتطيح
محسوبة محسوبة

بس الدمعة اعليك
مهيوبة مهيوبة

آه شنگول للذبحوا حبيبه

آه عطشان والماي اشيجيبه

*********************

وكر اعليك العطش
وانتَ جفنك مارمش
ظل يألمك

والتجأ ليك الضوه
والهوه يريدك هوه
خل يشمك

شفافك يريدن برد
والندى عاف الورد
ماكو يمك

مبتسم بس بزعل
مغضب وتنضح خجل
من يلمك

ليش اچفوف الخير
مبتوره مبتوره

ليش الگمرة اتغيب
منحوره منحوره

آه سلطان وخدوك تريبه

آه عطشان والماي اشيجيبه

*********************

طولك وطول الدهر
بانحنائك ع النهر
انحنالك

صدرك ايريده العدو
ظهرك ايدور اخو
مابگالك

سولف وياك السهم
قصة الچف والعلم
من اجالك

طيحتك فزعة شهم
نومتك وگفة زلم
من مثالك

مو خلوك اوصال
يموافي يموافي

حتى الحافر صاح
مو كافي مو كافي

آه مسلوب وتحشمك سليبه

آه عطشان والماي اشيجيبه

*********************

واضح ابگلبك حجي
تارس خيامك بچي
ماتبدت

شفتك ابأخر نبض
تضرب ايدك ع الارض
واستقرت

انتَ صليت الظهر
والعصر صلىٰ للعصر
دنيا سجدت

خيمة اختك أذنت
بالطفوف اتيممت
ماتوضت

ادري اضلوعك ليش
كسروها كسروها

بس اخيامك ليش
حرگوها حرگوها

آه حنيت واختك مو قريبه

آه عطشان والماي اشيجيبه

*********************

مطرت اسهام الحرب
وانتَ عينك عالدرب
عالشريعة

يابوفاضل مدلي چف
مدها لكن للأسف
چف گطيعة

ايست محد يرد
تهجم وعينك تصد
عالوديعة

والسؤال الينسأل
يعني زينب تحتمل
هالفجيعة

يدري الناس اتصيح
طلعوها طلعوها

هاي أخت العباس
شوفوها شوفوها

آه شمات وهوايه المصيبه

آه عطشان والماي اشيجيبه

*********************

اقسى انواع القتل
قتلوا ابحظنك طفل

مارويته
دمك ودمه انمزج
بالسمه السابع عرج
من رميته

ابيا لغة ادموعه حچت
من لوه الرگبة وسكت
ودعيته

گتله ياماي اشبعد
حتى هذا الـ بالمهد
ماحميته

حرگت وجه الماي
حسراتك حسراتك

خسفت صدر الگاع
دمعاتك دمعاتك

آه رديت ما تسمع نحيبه

آه عطشان والماي اشيجيبه

*********************


كلمات الشاعر السيد / عبدالخالق المحنة
تدوين / Zhraalobaidi



تـحـمـيل/إسـتماعMp3

[علي الواسطي]

عاشت ايدج عالمجهود