هنا

[✿ عِشق ✿]

حُسین حُسین... يایُمه
حُسين حُسين... يايُمه



جيتك ودموعي تصب
أبچي و مكسوره گلب
شفافك ذبلهه عطش
و ضعنك يحدونه غرب

فوگك ما باقي هدم
بجسمك ما باقي رسم
افرك بعيوني گُمت
هلبت كل هذه حلم


ياهو الگطع نحر راسك
بي چم وصي ونبي باسك
وليش الهجم على خيامك
فوگ التـرب رجع داسك


حُسین حُسین... يایُمه
حُسين حُسين... يايُمه


لچمنّي ضلوعي امس
گلب الأُم يايمه يحس
شفتك عالغبره جسد
نایم والحومه شمس

عمامه و چفيه خضر
صارن يوليدي حمر
بجسمك ما باقي ضلع
مابي بالحومه كسر


بيك اشعمل علي وجاسم
و ظهرك حنا قمر هاشم
واكثر بعد مرد روحك
ضعنك تفرهد الوادم



حُسین حُسین... يایُمه
حُسين حُسين... يايُمه


گلبي الفاگدله ولد
ما يگطع نوحه ابد
لو صوت الناعي سكت
يصرخ ويگله بعد

يعين الله العدهه ابن
اتحضنه وما عنده حضن
ما باقي بچفه صبع
وماظل عند اخته متن


الماعنده ام تشم خده
اخته تجي تون عنده
واذا اخته گطع بيهه
يضل فوگ الثرى وحده



حُسین حُسین... يایُمه
حُسين حُسين... يايُمه



انه ام الضامي چبد
اركض لخيامه وارد
اجمع بايتامه صرت
واحسب بحروحه واشد

يوليدي و عاري نمت
وعندك بالحومه اخت
شاطت وعيوني عمن
ومن طاحت يمه طحت


لا هو جرح و اداويلك
ولاضل ابن يتحيلك
لافي اخت ولا خيمه
لاضل اخو يجي يشيلك


حُسین حُسین... يایُمه
حُسين حُسين... يايُمه



لـــ الشاعر | أحمد الهلباوي |