ياخـوة صدگ
ياگلبـي اليدگ
يامعنـىٰ العِشگ
ياروح أخيتك يا گُمر زمــاني
گلبك مكاني وانا احبّ مكــاني
**************************
الاخو للأخت مأوى
لو رحلّ بينّت فجوة
لو تغيب بيش اعوضك بعد
فدوة لا تروح اريدك سند
اطمئن لو صحت بسمي
انا احس كل هلي يمي
من ابوي مات لگيتك ابو
وين اروح لو خسرتك اخو
هذا المو سهل
لا يا ابوالفضل
فراگ الاخ كتل
مو سهلة عشرة تنتهي بثواني
گلبك مكاني وانا احبّ مكاني
*************************
لو صحت يا بعد ناسي
يرتفع للنجم راسي
عمري ليش هيچ يخويه انكسر
واني تاج فوگ روس البشر
بلا وعي زيدت نوحي
من گلت يابعد روحي
هاللكلام نار سمعته ومتت
للوداع جاي دخيلك خفت
هاي انا الچنت
بيك اسعد أخت
مو زينب صرت
چنت اني امدللةّ زماني
گلبك مكاني وانا احبّ مكاني
*************************
لو صدگ ما ردت ترجع
راح اظل لو نويت اسمع
حتى اصيح آخ لاخير العمر
ما تنام عين رمشها جمر
مابقه من العمر ليلة
والوكت مر عليّ چِيلة
الله ريت لا يجيب الصبح
مو نهار موت اخلصه وذبح
ريت ادعيّ همس
لو يرجع أمس
ولا تطلع شمس
چنت أدعي لاجاني الصبح وأجاني
گلبك مكاني وانا احبّ مكاني
*************************
حاولت ما ردت ابچي
واتضح هالدمع يحچي
دمعي طاح فوگ اديك وكتب
لا تروح اريد اسمعك عتب
مو هوى كل نفس جمرة
من جرت دمعتي حمرة
گتلي جاي اسلّمه اللوه
والحنان ذاك سجلّه انطوه
ياريحة هلي
يوگفلك علي
وانا الله الي
ماعندي غير الله بعدّ تراني
گلبك مكاني وانا احبّ مكاني
*************************
توجهت للتهر انته
والنفس مختنگ عغته
للفرات سار معاك النبض
يالعليك موت على الله العوض
عيوني يم رايتك تربي
ها وگع ما وگع گلبي
امگطعات اديك اجاني الخبر
والسهام عليك اينزلن مطر
مو روه الوفه
وشيخ العاطفه
عالشاطي اختفه
دروني گلبي وماكو ما لگاني
گلبك مكاني وانا احبّ مكاني
*************************
من اوصلت مصرعك وحدي
لا ولد لا اخو عندي
ما لگيت عين اخذها السهم
ما لگيت ايد تشيل العلم
بالعمد هشموا هامك
طشروا عالثرى عظامك
تحيرت بين المك وطن
بين اعود بدون كفيل الظعن
ما ادري السبي
من حالي شيبي
واني ابنتّ نبي
الوادي المقدس هيبتي وكياني
گلبك مكاني وانا احبّ مكاني
*************************
كلمات الشاعر | أحمد الذهبي |
تــدوين | zhralobaidi |
تحميــــل//إستمــــاعMP3
مُحـــرم ١٤٤٦ ه
رد مع اقتباس