القصيدة: يله شيلوا الراية
أداء: مسلم الوائلي
كلمات: محمود الموسوي
~~~~~~
يا خدام بسم حسين
هل محرم يله شيلوا الرايه
~~~~~~~~
وتلاگوا الوفايه
والرايه حلوه الرايه
صورة عشگ عاشورك
.. نرسمها يحسين

هذا محرم جاينه
يحسين وانت افياينه
راحتنه من انزورك
.. وتشوفك العين

لا ليله گلبي ارتاح لا نهاره
إلا من اشوفن ذيج المناره
كلما محرم يبدي واصيحك
ارزقني خدمه وحب وزياره

عهدي وياك هاي العين
ما انام إلا اعله صوت اقرايه
~~~~~
هلت علينه ايامك
وتراكضوا خدامك
كلمن نصبلك رايه
.. فزعة عشگ هاي

يالعيشتنه بخيرك
ما عدنه واحد غيرك
نخدم سواد عيونك
.. تستاهل هواي

جيل اعله جيل يصير عدنه واهس
كل احنه متربين بالمجالس
طول السنه تلگانه بجمرنه
ومسودنين اتگول جنه عابس

ننطي ارواح ننطي سنين
وبخدمتك نبقه الك وفايه
~~~~~~
عاده وعشگنه العاده
خادم صرت للساده
ما عندي غيرك غالي
.. بس انت بالروح

انه اخدم ابن الزهره
عشرت عمر مو عشره
بحبي اختلف عالوادم
.. عاشگلي مذبوح

فدوه انه واهلي وكل العشيره
لتراب جدم حسين ومسيره
خلاني اخدم هاي احله نعمه
وحب الحسين النعمه الجبيره

مثل حسين نلگه منين
ماكو غايه حسين هو الغايه
~~~~~~
اكبر سفينه العاشر
والما يخدمك خاسر
يم بابك اتمنينه
.. هاي احله أيام

مد ايدك اعله الرايه
وانطي الحسين احجايه
گله انه ابد ما اعوفك
.. وحسبنه خدام

خل كلمن يصيحونه بإمامه
عدنه الحسين بيوم القيامه
ما عدنه يوم المحشر خساره
مشايه عدنه وعدنه الخدامه

احله أيام وي حسين
مجلس ودمعه وفرض مشايه
~~~~~~
وينه اليضدك وينه
مثل الجمر يدرينه
نحرگ حرگ بالغيره
.. خدام الحسين

وداعت علي والزهره
ما يگدر ايمس شعره
فنه اليجي للحضره
.. واحنه المجانين

هذا الحسين وفنه اليجيله
ما يظل ليله وداعت العليله
احنه محرم عاش بدمانه
وحسين يطلع ويه الفصيله

ادمنا ما ننطيه
انطيح گبله ارگابنه محنايه
°°°°°°°°°°°°°°°°°°°°°°°°° °°°°°°°°°°°