ـــــــــــــــــــــــــ ـــــــــــــــــــــــــ ـــــــ
القصيدة: شمسوّي بيها
أداء:محمّدبَاقِر الخَاقانيّ
كلمات:احمد الهَلباوي
ـــــــــــــــــــــــــ ـــــــــــــــــــــــــ ـــــــ
اشوفك وانكسر يَهلال.. نيران الهَضم تلهب
اصيحن والدَمع همّال.. شسوّيت بگلب زينب
شمسوّي بيها.. شمسوّي بيها
ـــــــــــــــــــــــــ ـــــــــــــــــــــــــ ــ
يَهلال.. ما زال ليهسّه اُم عون تحس بغُربة
المفجوع.. بخِيام قُوسك مِن يظهر يشلع گلبه
المَفجوع برُمح لو شافك تِهل هلّة عيونه
ويذكر طيحة المّا عنده اخو ومحدّ وگف دونه
تبدي الذكريات تعيد الم شُوغاته ومتونه
تعدّت چم مُصيبة.. علىٰ عيون الغَريبة
جرت دَمعتها يَهلال.. علىٰ الجثّة السَليبة
بالحومة البچي كتّال.. مِن عندها الجِفن شَيّب
اصيحن والدَمع همّال.. شسوّيت بگلب زينب
شمسوّي بيها.. شمسوّي بيها
ـــــــــــــــــــــــــ ـــــــــــــــــــــــــ ــ
هلّيت.. يَهلال وجِبت شچم صَرخة تضج ب وريدي
كل يُوم.. هَـ الصوت مِن گلب الزهرة تصيح وليدي
التسمع صُوت إبنها يصيح انا عطشان اظن تِعمه
وصارت تلتوي مِن الحسرة لو واحد يجيب إسمه
وتدري بهالشهر خيل العِدا يجولن علىٰ جِسمه
شهر اُم المُصايب.. شهر نُوم الخَرايب
لهسّه تتاني عبّاس.. وگُمر خيمتها غايب
تشوفك والگلب ما زال.. يِنعىٰ الخِدر المسلّب
اصيحن والدَمع همّال.. شسوّيت بگلب زينب
شمسوّي بيها.. شمسوّي بيها
ـــــــــــــــــــــــــ ـــــــــــــــــــــــــ ــ
يَهلال.. ردّيت تجرح گلب إخت المحدّ شاله
مِن يوم.. عاشور ولليوم تون لـ اجله وتنعاله
تذكر وَگفة التل ذيچ والركّضها بالبيدة
راحت صُوب اخوها وشافته گوّة يشيل إيده
وبالزهراء تحلّفه يرد عليها ويگعد تريده
وگفت يَمّه وتگول.. ردّن عنّه يخيول
هـٰذا إبن اُمّي عَ الگاع.. لگيته ولنّه مچتول
يَهلال وبيديها حِبال.. شلون يصير المعذّب؟
اصيحن والدَمع همّال.. شسوّيت بگلب زينب
شمسوّي بيها.. شمسوّي بيها
ـــــــــــــــــــــــــ ـــــــــــــــــــــــــ ــ
نيران.. يَهلال تسعر بالرُوح العاشت حيرة
عَ النوگ.. لاوين راحت مسبية تُطب يا ديرة
الصاعد عَ الهِزل مِن يجبل تشوفه الخَلگ كلها
طرّت هيمة لـٰكن ماكو اخو يعدّل محاملها
الوادم والزمان إعليها بالشام ومِنو إلها
يَهلال الدَرب چان.. طويل وماكو خوّان
يا ويلي القصر ذاك.. كَلفة تچهبه نسوان
الشاف اُم الخِدر بحبال.. حگّه هنانه يتعجّب
اصيحن والدَمع همّال.. شسوّيت بگلب زينب
شمسوّي بيها.. شمسوّي بيها
ـــــــــــــــــــــــــ ـــــــــــــــــــــــــ ــ