الشمس طلعت والشعاع جروح
وصعبات الجروح اهواي اذوها
سنة ستين للهجره بشهر معلوم
تگول اهلي بخبرهم روحي هظموها
مشينه من المدينه النينوى ايام
بظعن ولنوك شباني يحرسوها
طلعنه بليل نمشي والطريق بعيد
ورايه جدنه ايد اسباع شالوها
وكل ديره نمرها تنعم بخيرات
وبعض ديار للخيرات باعوها
الكوفه الخير اجاها من نزل مسلم
شوفو بيش للخيرات جازوها
غدرو بالسفير الراد يصلحهم
بكثر ماخوف بيهم عينه شدوها
وچتفوه بسلاسل من حديد ثگال
من قصر الاماره جثته شمروها
مايكفي الخيانه والغدر والموت
بجثته مثلو بالسوك جروها
ومن جانه الخبرعن موقف الكوفه
وليان الظعن للوجها غيروها
ومشينه ايام تلو ايام وايام
ولعيوني صور لاحت وتروها
نزلنه بكربله والعالم يشوفون
وخيمنه الشيبه والشبان نصبوها
شدت ورد احنه والعطر فواح
عطر قبل البشر الاملاك شموها
عشرة ايام مرت والظعن مرتاح
راحه معلعله وكلكم تعرفوها
ظعن شايل قضية دين والمبدئ
فداء وتضحيه الاعمار طشوها
وبديت اتخايل الالام واللچمات
ابيش دموع عيني اهناك شدهوها
ياجرح العطش بالدمع سديناه
وجروح الجوارح روحي روعوها
جرح فرحت عرس ياويلي متهنه
على بدلة الحنه شموعه طفوها
خيل ونار ناس اشرارهاي الناس
حتى الفرحه من دلاله باگوها
وجرح الاكبرعلي يازينة الشبان
اسهام الغدر اهل الغدر يرموها
حار اصواب چبده والليالي شهود
بغض للهادي جده جثته فصلوها
وابو فاضل اخويه وكافل اظعوني
سهم بعيونه صابه الجربه بچوها
العمود براسه صابه ونذبح عطشان
وعلى نهر الفرات چفوفه گطعوها
وعبدالله الرضيع البعد عمره اشهور
ما كمل سنه لدموعه شربوها
وهذا اصغر فدائي بكربله ذبحوه
رگبته الچنها ليلو بسهم صابوها
وجرح حسين اخويه شلون بالميدان
حزو نحره حتى اهدومه سلبوها
وغاره تروح غاره تسحك بجسمه
وذر جثته على التربان خلوها
ماخلصن جروحي بعد بيها اهواي
من هجمو علينه خيمنه حرگوها
اسهام ارماح ضرب اسياط
حرم وطفال بالميدان طشروها
ومن نار الخيم بعيوني شبت نار
شقت بيها رقيه شلون عذبوها
تركض حافيه وتعثر بدمعتها
توجعني اذاني عمه ضربوها
نسوان وارامل رضع واطفال
هجن بالبريه الروحي وجعوها
تعبانه وللم بيهم وتعبانات
ومهظومات عدواني تولوها
وحبال وسلاسل يمنه متحضرات
والنوك الهزيله اليمنه جابوها
ياويلي يگلبي چم جرح بيك
عمة عين اليالي شلون حسبوها
////////////////////////////////////
الشاعر هاني حماده البلداوي
رد مع اقتباس