هنا

[✿ عِشق ✿]

ـــــــــــــــــــــــــ ـــــــــــــــــــــــــ ــــــــ
القصيدة: بچفوفي قَارورتكم
أداء: محمّدبَاقِر الخَاقانيّ
كلمات: احمد الهَلباوي
ـــــــــــــــــــــــــ ـــــــــــــــــــــــــ ــــــــ
گلبي إعله فرگاكم يسولف ضِمه
بچفوفي قارورتكم تُصب دِمه
وشِفت الجَرىٰ بخِيامي.. لحَد طيحتك يا ضَامي
بچفوفي قارورتكم تُصب دِمه
ـــــــــــــــــــــــــ ـــــــــــــــــــــــــ ــــــــ
يا بُوية آنه جَرح فراگ ما صَحّتله طيبة
مِن يوم الرِحت كلساع تفجعني المُصيبة
آنه إسمي العَليلة چان صار إسمي الغَريبة
آنه اُم جِدم مزروعة عَ الباب
ابچي بگلب اُم عِندها إبن غاب
تنشد عليك الرايح و رَاد
وراسي يَبويّ مِن الهجر شاب
هنانه ولچمني حَر عُطش كَربلا
وب احلامي اشوفن شَتّ ظعن بالفَلا
صارت مُصيبة احلامي.. لحَد طيحتك يا ضَامي
بچفوفي قارورتكم تُصب دِمه
ـــــــــــــــــــــــــ ـــــــــــــــــــــــــ ــــــــ
هاي آنه اُم گلب عَطشان مزروع إعله بابك
ومِن قَبل الخِيم محروگ يا بُوية بغِيابك
وشافوا دَمعتي الاجناب مفجوعة بمُصابك
آنه العشت ست اشهر تنوح
ومچتّفة بحَبل النعي الرُوح
وتعثر صَفنتي ودمعتي تطيح
مَذبوحة وابچيلي إعله مَذبوح
عشت المُصيبة وجِفني گطّر دِمه
ويِبست لَهاتي مِن الركض والضِمه
وطاح العَلم گدّامي.. لحَد طيحتك يا ضَامي
بچفوفي قارورتكم تُصب دِمه
ـــــــــــــــــــــــــ ـــــــــــــــــــــــــ ــــــــ
آنه إلي يبات وِياي شوغاتي بهَجركم
وتندهني الدموع انوب واگعد وانتظركم
لا اندل ولا إلي حيل حتّىٰ اتبع اثركم
لا يَمّي إنتَ وتهجع العين
ولا حصّلت وحدة مِن الاثنين
لا مِتت لا اخذتوني يَحسين
وما ادري بيكُم وين ما وين
اوّل وداع بعيني طفّه الضوه
ويّ رَفعة إيدك گلبي طَب نينوىٰ
وسودة اصَبحت ايّامي.. لحَد طيحتك يا ضَامي
بچفوفي قارورتكم تُصب دِمه
ـــــــــــــــــــــــــ ـــــــــــــــــــــــــ ــــــــ
حين الغمّضت لحظات شفتك رَافع إيدك
يم العَلگمي ومكسور وتحشّم عَضيدك
بيش ارجع يَبو النوماس وخِيامك تريدك
شفتك رجعت بغير عبّاس
تمشي ويِهد حيلك حچي الناس
يگولون ضَل وَحده ويگولون
سيّد الشَباب مشيّب الراس
وتُوگع يَبوية مِن المُهر عَ الثرىٰ
وتطلع تدوّرك عمتي المخدّرة
ما كَف جِفنها الدَامي.. لحَد طيحتك يا ضَامي
بچفوفي قارورتكم تُصب دِمه
ـــــــــــــــــــــــــ ـــــــــــــــــــــــــ ــــــــ

[A.O.K]

ماجورة ومثابة
شفيعتج الزهراء عليها السلام