القصيدة:- يا بُو عَلْيّ
الرّادود:- المُلّا مُحَمَّد الجنَّامِيْ
الشّاعر:- كرار حسين الكربلائي
~~~~~~~~~~~~~~~~~
اسود لبس كلّ الفلك يا بُو عَلْيّ
نظره ردت أتوسلك يا بُو عَلْيّ
وباوعت الي شكرًا الك يا بُو عَلْيّ
~~~~~~~~~~~~~~~~~
بين إهلال المُحرم ياغريب
وبالگلوب اتعلگت اعلامك
من لبست الاسود الحزنك بچيت
وصاحت ادموعي هله ابأيامك
الف شكرًا ياحبيبي ياحُسين
هالسنه امخليني ويه خدامك
انطيني دمعه انطيني حركه انطيني آه
ابگلبي اشعل جمره من خيامك
نار الخيم وسط الگلب ما تنطفي
ومحرمك جمره غرب ما تنطفي
عيني بچت تتأملك يا بُو عَلْيّ
~~~~~~~~~~~~~~~~~
اتبدلت رايتك سوده اعله الضريح
وشالت الزهـره القميص اباديها
ونزلت من السمه وتلطم بالعزاء
والده وغالي عليها وليدها
انحلف الزهره ابمصابـك يالحنين
هاي لوعتنه عليك اتزيدها
واسطه نريدك نحلفك بالرضيع
فاطمه ترضى علينه نريدها
هذا العزه وهذا الدمع لأم الحسن
نلطم صدر نكسر ضلع لأم الحسن
فدوه الك انت وهلك يا بُو عَلْيّ
~~~~~~~~~~~~~~~~~
انه من زغري اعله بيبانك يتيم
اتكفلتني وصرت للنعمه ولي
امخلي عيني ابعينك وكلشي نسيت
وانـه ادري بعطفك اتبــاوع الي
ما الي شغله بفلان ولا فلان
المهم عندي خدمتك يا بُو عَلْيّ
انه بيّن النّاس احس نفسيّ غريب
انت اهلي يابعد عمري وهلي
مثل الهوه أتنفسك طول العمر
خـل أظل بمجلسك طول العمر
عبدك بذل كلّ ماملك يا بُو عَلْيّ
~~~~~~~~~~~~~~~~~
اگبال اقرب ناسي دمعي ما يطيح
ومن يمر طاريك ترخّص دمعتي
وين ما گالوا عَزه اركض أجيك
ارد ابچي النّاس هذي نيتي
عمل ماعندي إذا باچر أموت
بيك ازامط غاد ليله وحشتي
راح اگـلـهم چنت خادم للحُسين
ياحُسين ارجوك تقبّل خدمتي
انت الذخر وانت الامل يوم الحشر
يشهد الي دمعي الهمل يوم الحشر
الـمــن اروح انه اسـالك يا بُو عَلْيّ
~~~~~~~~~~~~~~~~~
من اشوف الماي يهضمني واصيح
ليش مات حسين ابوي من الضمه
من تشـوف النّار تچويني الخيام
آه يا حرگوا اگباله مخيمه
حسين يالشيبك صفه ابدمك خضيب
مايكفي أعليك ابچيلك دمه
عهد حد الموت اظل ابچي عليك
والطم اعله الصدر قربه لفاطمة
گطع النحر رض الصدر ماينسي
حرگه الخيم درب اليسر ماينسي
هذا العمر مرخوص الك يا بُو عَلْيّ
~~~~~~~~~~~~~~~~~