كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
آنا العقيله الـ عالخلگ متعلّيه بخدري
عيني على سبع الگنطرة المتكفل بأمري
تحالفن خدري و شيمته وعمره ويَ عمري
ياصبر يحمل فرگته تهدّم ركن صبري
لو صبر گلبي بيا عذر أكطع دمع عيني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
شأنسى حَميتك خوتك وكفاتك و جودك
لو سهم عينك يالگمر لو گطعت زنودك
أفتخر چنت أعله العرب والفخر بوجودك
هم يغلط حساب الدهر و لزينب يعودك
وتورّد بماي الوفا وي عمرك سنيني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
صارت سلوتي بفرگتك بس أحسب جروحي
وكل عمري اخلصنّه بچي وما أرحم بروحي
عباس حزني و لوعتي عباس كل نوحي
لو تنسى حتى أم الولد ما أنسى مذبوحي
حال الحتف يا ابا الفضل مابينك و بيني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
الله يعين الفاجده مثلك يابو الغيره
من ديره دولبها الوكت بَعد لأشر ديره
التنگطع چفينه غدر عنده معاذيره
لَچن الدلّلها بُقت مهظومه و بـ حِيره
ياريت آنه تگطعن يسَراي و يميني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
ياريت تنظر حالتي يا كافل ظعوني
وشلون عنك باليسر عمداً ينشدوني
يشتموني وأسمع شتمتي وبس تهمل عيوني
و لليوم نيشان الضرب ياخويه بمتوني
شما أذكر مصاب اليسر ياخوي يأذيني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
شما اذكر مصاب اليسر تخنگني العبره
ما چني بنت المرتضى و والدتي الزهره
مكسور گلبي من الهظم والكسر شيجبره
لو يدري گايد ناگتي بالصار واليجرى
لو يدري من يوم الوگع ما بَطَل ونيني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
لو يدري من يوم الهون عالمشرعه چفوفه
ولو يدري أخته بيا وضع من طبّت الكوفه
لو يدري مجبوره رحت لو بيدي ماعوفه
لو عدل حمّاي الظعن والحالي ايشوفه
شلّي بحياتي من بعد عباس و حسيني
كافلني ليش بكربلا وحيده تخلّيني
ـــــــــــــــــــــــــ ـــــــــــــــــــــــــ ـــــــــــــــ
-كافلني ليش بكربلا
الرادود | محمد الباقر الخاقاني
الشاعر | علي الناصري
رد مع اقتباس
المشاركة الأصلية كتبت بواسطة pharmacist
