صَلّىٰ ﷲ عليكَ
الذَي جَعلَ أفئدةً مِنَ النَاس
تَهوي إليكَ صلّىٰ ﷲ عليكَ
ـــــــــــــــــــــــــ ـــــــــــــــــــــــــ ـــــــــــــــ
أفتح عيون الگلب
شوف من خلف الحُجب طـريقي
تأمل بـهذا الدرب
هذا اليسمونه حُب حقيقي
من تقوى الگلب عظّم اعظم شعيره
سد عين البصر وافتح عين البصيره
شوف أم الخدر ردّت لاچن اسيره
لتشوف الدرب خيمه وبصفها خيمه
شوف العايله بهيمه تذبها على هيمه
كل طـفـله التشاهدها تصوَّر يتيمه
ومن بين صوت الزائرين
بأذن الگلب أسمعه ونين
مازالت العيلة تنوح
من أربعين لأربعين
وبواقعك عيش الخيال
من تنچوي بـ حَر الرمال
تصوَّر بنات مدللات
بالشمس وبچفهن حَبال
حسيـن آه حسيـن آه
ـــــــــــــــــــــــــ ـــــــــــــــــــــــــ ـــــــــــــــ
الممشى بالظاهر سفر
لاچن الباطن صور غريبه
هالدرب ملگى بشر
ملگى جسم وي النحر مصيبه
بَالحر والشمس لمن تتعب يجيلك
خادم معتني يكلّك گوه ﷲ حيلك
شايلّك عذب بارد يروي غَليلك
تطوي موكب لموكب درب السـلامه
زاير كربله واجب يحفظ مقـامه
ولخاطر ابو سَكينـه تلگه الكرامه
لاچنْ سكينه بلايه راي
تذكرها مِن تشـرب الماي
من تستضل بهالطريق
تذكر الما عدهن فياي
والليل لو هوَّد عليك
تلگه المچان اليحتويك
تذكر خرابه بلايه باب
وابچي بكثر ما حرگه بيك
فأنظر بين يديكَ
سَترى قصصاً بَل غُصصاً
دماً تُبكي مُقلتيكَ صلّى ﷲ عليكَ
صلّىٰ ﷲ عَليكَ
الذَي جَعَلَ أفئدةً مِنَ النَاس
تَهوي إليكَ صلّىٰ ﷲ عليكَ
ـــــــــــــــــــــــــ ـــــــــــــــــــــــــ ـــــــــــــــ
- أفتح عيون القلب
الرادود | محمد الباقر الخاقاني
الشاعر | الميرزا عادل اشكناني
رد مع اقتباس
المشاركة الأصلية كتبت بواسطة YAĞMUR
