إلَك جبت الشمس
والنار أقواس
إلك صلّت سيوف من الفرح تنباس
إلك واهس يعدل الفكر بالرآس
جرّحني اعلى طولي فرح
لا باس
ورده إتطگ همومي وترفع الراس
ولو چفّك حرير و خاف ينجاس
ولك جيّس الورد
يتلوّن الياس
أهيّس جرحي بچفوفك
جمر ينباس
خيط الدم يروح بعيد
يمتد بطول الفرات بعيد
يلمض براسي غضب
ويعيد
هالة چفوفنا
اتعاند ولا تنداس
وصهيل عيونچ
يورّد حلم ينجاس
عيب الناس تمشي بذلة الناس
إلك خضرة الأغاني تفيض أنهار
وإلك سر الغميج
اليشبگ أسرار
رجف طولي رمح
يتنطرك ثار
أعبدك ريح من تلعب لعب بالنار
لو دار الزمن
بالموت إلك نندار
فاض الدم بيديك إجروحي أفكار
مدري الزمان أختلف
مدري أختلفت الناس
وديّت النذر شمسين للعباس
گمرة صوت من يصعد فرح بالراس
يدگ هذا الضمير بذاك
و يخلي الدم
يشدّ الناس للناس
الحزن نجمة تطيح
بطارف العين
بچت أمي عليك بصدري مرتين
ضحك شيبج بيديّ
ووَجّت سنين
هالة و كَمرها انداس بالطين
أشوفك بالحلم
تضحك بساتين
ذبحني السر عليك
ودمي صوبين
مصلوب اعله بابك
منهو أنتَ ، منين ؟
من تلمض تفگ
تعرگ چفوف الناس
رجف بيدي الحنين لشوفتك كآس
ولك فُرّ الحنين
ووگع الوهواس
و خلّي الدم
يشدّ الناس للناس
أحط دمي اعلى جفك
يعتلگ موال
روحي الخيل من تصهل سيوف طوال
عيوني من الفرح
طارن حمام أشكال
ويّاك يمشي النبض
مَشعل بجف خيّال
دمي بدفترك
وردة ورسوم أطفال
الشاعر لو بچى
دم و غضب جتّال
طوله يصيح
يصعد أغنية
و ينزل گمر بالريح
يصلّي اعلى الجرح
تضوي الخيول إتصيح
ويصلي النوب عكس الريح
لا ما أطيح
يفز غبشة الجرح
كلّش يريد إيصيح
من تلمض تفگ
تدمع چفوف الناس
أويلي إيرف بيديَّ
اشچم نهر حسّاس
و بچى گبل المشي
عَطّب بگلبه الحچي
وغص النبض بالناس
يا مَشعل يجيب الناس
للناس



من ديوان: النهر الأعمى
حزيران 1980