القصيدة: معقوله
أداء: مسلم الوائلي
كلمات: علاء عبد الحسين الكربلائي
~~~~
معقوله انتي اخت النجابه
شجابج يزينب لهاي الخرابه
ما اصدگها بلا وليان
اخت حسين اطب ديوان
معقوله .. معقوله
~~~~
هند اعله الرمل گعدت
تبجي وگابلت زينب
شصاير بيج مولاتي
غريبه ووجهج امترب
متعبينج ..معطشينج
مجتفينج .. ماكو صوتج
يا اميره .. ليش اسيره
بلا عشيره .. وين اخوتج
لا يالعقيله شنهو الجرالج
شلون الشماته شافوا خيالج
منهو يصدگ بالأحزان
اخت حسين اطب ديوان
معقوله .. معقوله
~~~~~~
يهند دموعي تحجيلج
شسوت كربله بحالي
عليه احترگت الخيمه
واخوتي مذبحه اگبالي
جسم الأكبر .. شبع طبرات
وذيجه امه .. ميسريها
انذبح جاسم .. تحنه بالدم
وهذي رمله .. مجتفيها
عبدالله شفته نبله تذبحه
وبگماطه راسه انشد اعله رمحه
اليگطع منحر رايد جان
اخت حسين اطب ديوان
معقوله .. معقوله
~~~~~~~
يهند ولا تنشديني
عن راعي العلم وينه
ذاكه اعله الرمح راسه
العلامه السهم البعينه
بعمد راسه .. مهشمينه
وفوگ متنه .. مطشرينه
وبلحيته .. جامد الدم
جفوفه طاحن .. موذرينه
حامي الضعينه عگبه انسبينه
وكلما اطيحن اسمع ونينه
جي عباس بلا ذرعان
اخت حسين اطب ديوان
معقوله .. معقوله
~~~~~~~
يهند احجيلج اعله حسين
اخوي بيا وضع عفته
اثنعش طبره انطبر نحره
وراسه بالطشت شفته
شنسه شذكر .. جروح الحسين
جانت الفين .. وگلبه ضامي
مسلبينه .. ودمه يجري
وجان اخويه .. جسمه دامي
احجار اعله جسمه جن تله صاير
وبنحره شفته طبع الحوافر
وصاح الشامت بالنسوان
اخت حسين اطب ديوان
معقوله .. معقوله
~~~~~
مجتوفه بحبل عالنوگ
يهند وصار بيه الصار
وصلت الشام آ يالشام
تطلب بينه جانت ثار
كلها تحجي .. ذيجه زينب
وصرت فرجه .. وانه وحدي
شتموني .. والسباني
بكيفه امري .. گومي اگعدي
طحت اعله وجهي الحادي ضربني
وبذني سمعته الوادم تسبني
ضحكوا كلهم صاحوا حان
اخت حسين اطب ديوان
معقوله .. معقوله
~~~~~~~
يهند اللي هظمني هواي
العدوا نسوانه مستورات
وخوات حسين بالديوان
بحبل مجتوفه مسبيات
شلون دنيه .. الخلت الناس
تريد سكنه .. عدها تخدم
بالدواوين .. هذا حالي
واسمع يزيد .. بينه يشتم
اگبالي تفاخر مجتوفه ادينه
يسب الزجيه ويضحك علينه
رادوا شتمي وگال الآن
اخت حسين اطب ديوان
معقوله .. معقوله
°°°°°°°°°°°°°°°°°°°°°°°°° °°°°°°°°°°°
رد مع اقتباس
المشاركة الأصلية كتبت بواسطة YAĞMUR
