ما حسبت هالكثر .. حُـبك الي .. حُـبك الي
تتگطع وتعتذر .. يبنَ عليّ .. يبنَ عليّ
يتفايض بروحك .. أعذب نهر
ممنونة لجروحك .. طول الدهر
ـــــــــــــــــــــــــ ـــــــــــــــــــــــــ ـــ
١
ليلة حزن مُظلمة .. تغيرّ سواد السمة
لونة امتزج بالدمة .. لاح الخطر عگب الأمان
رغم الحصل والجرة .. بالهيبة وگفت مرة
صوب النهر ناظرة .. يمكن عتب يحچي اللسان
الطف من حچت منذهل .. أمر ويفوق العقل
گالتله يا ابا الفضل .. شكراً يسُـلطان الحنان
بين عليها التعب .. بس ماتسولف عتب
لازم بماء الذهب .. هذا الحچي يكتبه الزمان
صوت المرة العالمة .. يعرفه الملَك .. يعرفه الملَك
بي بحَة من فاطمة .. بخُطبة فدك .. بخُطبة فدك
بي شدة من حيدر .. يوم الخطر
من خيها تتشكر .. طول الدهر
ـــــــــــــــــــــــــ ـــــــــــــــــــــــــ ـــ
٢
كل الغموض انجله .. حين اللي گالت إله
عگبك صرت كافله .. عباس ايا نعمَ الكفيل
زينب انه واشكرك .. اثني اعله دم منحرك
شمسوي حتى اعذرك .. يمسوي لأجلي المستحيل
حُب خجل المشرعة .. چَفينك امگطعة
اشلازم جزاء اصنعة .. وشلون أرد ليك الجميل
عين انطفت بالسهم .. والأخرى تشكي الندم
حد ماجمد بيها دم .. رادت تضحي لو قليل
راسك يخوية انهشم .. من العمد .. من العمد
چن راسي علو القيم .. وأعلىٰ بعد .. وأعلىٰ بعد
رغم الخسف تبقى .. أجمل گـُمر
واسمك يظل يرقى .. طول الدَهر
ـــــــــــــــــــــــــ ـــــــــــــــــــــــــ ـــ
٣
عذرك بلغني ووصل .. ليش العذر يابطل
تنزف دماء وخجل .. أذتني خويه الحالة هاي
والماي لوتعترف .. ماجبته حال الحتف
جايبلي حُب مختلف .. هوَه اللي چان الروحي ماي
والجربة لمن هوت .. صدگني روحي ارتوت
هاي المعاني احتوت .. تقديري عباس ورضاي
بيك القدر منعجب .. مثلك فلا ينكتب
اخ لأخيته يحب .. لا گبلي حتى ولا وراي
للخوة صرنه مثلّ .. الكل يعرفه .. الكل يعرفه
وحيّ المشاعر نزلّ .. بسورة وفه .. بسورة وفه
يالعلگمي إحرائك .. مُرسل فخر
ربّ العرش شائك .. طول الدهر
ـــــــــــــــــــــــــ ـــــــــــــــــــــــــ ـــ
٤
تكريم تستاهله .. مني ومن العايله
خل يبدأ ابكربله .. بسم الله رحمـٰن ورحيم
ابليلة بچي ونايحه .. اوگف الك مادحه
اقرالك الفاتحه .. يَبنَ الصراط المستقيم
لو گال صوت الجرح .. مو هذا وكت المدح
اسبابي خل تتضح .. وبتضحياتك خل اهيم
حقك اريد اكرمه .. من گبل لا هالدمه
اتجف اعله جسم ارتمه .. هذا اليليق اويه الكريم
ماقصرت لت ابد .. فعلاً كفو .. فعلاً كفو
تدري الفضل ماشهد .. بيه العدو .. بيه العدو
من تحچي عدوانك .. تحچيّ بحذر
شاغلها ميدانك .. طول الدهر
ـــــــــــــــــــــــــ ـــــــــــــــــــــــــ ـــ
٥
مو منّة لا والعلي .. المنّة يخوية عَلي
بت فاطمة وبت علي .. من تشكرك هذا وسام
علگه اعله صدرك فخر .. مثل النقش عالحجر
اعظم كفيل انذخر .. گول وفعل گد المقام
اشهد بأنك وفي .. بمدحك فلا اكتفي
ماتبلغك احرفي .. اكبر من اينولك كلام
شيجزاي فضلك بعد .. يالما بقالك جسد
حبك تجاوز عدد .. ما شايل اجروح وسهام
بس عندي يا ابا الفضلّ .. هالمسألة .. هالمسألة
ليش ارفضت تنحملّ .. للعايله .. للعايله
خل اسمع اجوابك .. من النحر
يامن بقىٰ مصابك .. طول الدهر
ـــــــــــــــــــــــــ ـــــــــــــــــــــــــ ـــ
٦
ياخويه خل اسألك .. حسين اعتنى لمقتلك
ليش ارفضت يحملك .. واعضائك ايلمها ابحصير
خجلان من رجعتك .. لا يا بعد عيلتك
خفنه على جثتك .. صار الذي خفنه يصير
جسمك بقى وحده .. وتناوشوه العده
بالبغض مترصده .. مو انتَه مقصدها الامير
وحسبن رد للخيم .. رد محني من الألم
بيده اعله ظهره لزم .. وتيقنت ظهره كسير
ما گلّي عن موتتك .. يجري الدمع .. يجري الدمع
طيّح عمّد خيمتك .. فهمي الوضع .. فهمي الوضع
يمخلي بأبن امي .. كسرة ظهر
همه مثل همي .. طول الدهر
ـــــــــــــــــــــــــ ـــــــــــــــــــــــــ ـــ
٧
حسين اللي صوبك طلع .. مو هوهَ نفسه الرجع
حط ابدليلي الوجع .. لا الله راواك المصاب
اشرحلك ابدمعتي .. عن حالته وحالتي
لو قاسية چلمتي .. خوية لتعتبره عتاب
ابموتك دريت اشعنى .. ابهالحظة شمر الخنى
منحر عضيدك دنى .. وخله للسمه بحال ارتقاء
بهالمعنى بنت النبي .. عگبك دناها السبي
وبولية الاجنبي .. اسياط شتم ذلة وعذاب
بالطف فگدتك خدر .. ياكافلي .. ياكافلي
راح افگدك باليسر .. فزعة ولي .. فزعة ولي
وبحرگة اخيامي .. فگدّك قـهر
تبچيلك آلآمي .. طول الدهر
ـــــــــــــــــــــــــ ـــــــــــــــــــــــــ ـــ
٨
بيك الله ميت رحم .. ماتصغي بچي الحرم
صارت رماد الخيم .. كل خيمه شبت بيها نار
ثقل الإمامة انتقل .. لليشكي جسمه العلل
گتله يعمه العمل .. گلّي عليكم بالفرار
رحمة انتَه هم ماشفت .. حين الذي اتراكضت
اجمع يتامى صرت .. واتعثر ابهاي القفار
وين انه وين الركض .. اعله امر الله ما اعترض
ياخويه لا تنتفض .. والموتة ابلغ اعتذار
يا ابا الفضل اسفة .. زدتك ألم .. زدتك ألم
اچفوفك عزم نازفة .. تريد العلم .. تريد العلم
زدتك أسىٰ وحيرة .. بهذا الخبر
ياسيد الغيرة .. طول الدهر
ـــــــــــــــــــــــــ ـــــــــــــــــــــــــ ـــ
كلمات الشاعر : علي السقاي
تــدوين : Zahra.alobaidi
MP3
رد مع اقتباس
المشاركة الأصلية كتبت بواسطة sawsanmahmoud
