تعالوا شوفوا اوياية .. عجائب المشاية .. هذا رفيف الراية
دوة العين...
درب المشيّ اعجوبة .. كل خطوة بي مهيبوبة .. سيرة عشگ مكتوبة .. للـحـسين...
ـــــــــــــــــــــــــ ــــــــــــــــــــــــ
هالفقرة عـالفطرة .. سوت موكب اشكبرة .. ماعدها ملايين وترحب بالملايين
وانا اكتب متعجب .. رفعوا قطعة بالموكب
نحن الفقراء واغنانه الله بحب الحسين
هاذي وادم فقيرة والله غانيها غيرة
يقدم لضيفه كرسي وهوه صاحب حصيرة
حتى بيته الزغير بي يضيف عشيرة
يگول احنه شنهو انطينه
بجيب الحسين ايدينه
واليمشي فضله اعلينه
يظل دين...
فاز المشه لمحبوبة
كل خطوه بي مهيبوبة
سيرة عشگ مكتوبة
للحسين...
ـــــــــــــــــــــــــ ــــــــــــــــــــــــ
عالنية القلبية .. شفت أمنّة الجنوبية .. متعوبة ومابيها قوة معصبة الراس
للخدمة متحزمة .. وتعادل الف زلمة
متحزمة بعلگ بي ريحة من شباچ عباس
هالكرامات احسها غيرت بينه كلشي
العمره سبعين اشوفه ابلايه عكازه يمشي
افتخر بالمشاهد والدمع مالي رمشي
هذا العزم من حبنه
واحنه قوي صاحبنه
نحبنه نظل ويحبنه
للسنين...
رفعة قدر مصحوبة
كل خطوة بي مهيوبة
سيرة عشگ مكتوبة
للحسين...
ـــــــــــــــــــــــــ ــــــــــــــــــــــــ
مو صدفة مستشفه .. الكلمن حالته كلفه .. الحل لكل مرض وافضل دوه اتراب الزيارة
الطايح والرايح .. رد الديرته صايح
سواها الحسين ادخيله وانطاني البشارة
والدعاء اعله بابه هوه احسن طِبابه
سر ابو اليمه الاعظم حير الطب ترابه
عافية ودنيه وأُخرى للي يبچي لمصابه
الله رزقنه بحبه
يقضي الحوائج دربه
سرنه بطريقه صحبه
ملايين...
الدربه الخدم منسوبة
كل خطوة بي مهيوبة
سيرة عشگ مكتوبة
للحسين...
ـــــــــــــــــــــــــ ــــــــــــــــــــــــ
بالمنظر هيه أصغر .. بس تستوعب واكثر
والله كربله الجغرافية احتارت بأمرها
تتوسع تتفرع .. بيها الدنيه تتجمع
تشعر كربله بالأربعينية اشكبرها
هالعدد كله لكن لا نزاع ومشاكل
أخوة تستقبل اخوة فتحتلها المنازل
وكأن ابچفوفة لمسة من ابو فاضل
كافلنه عم الساده
حاسبنه مثل اولاده
وزع علينه امراده
بالإيدين...
نمشي الدرب بأسلوبة
كل خطوة بي مهيوبة
سيرة عشگ مكتوبة
للحسين...
ـــــــــــــــــــــــــ ــــــــــــــــــــــــ
مشاية عالغاية .. يازينب على الراية
نستقبلها بدموع الحزن هذا النريده
انماشيها انحييها .. جابت حقها بيديها
أهلاً بالسبّت شام العِده وذلّت يزيده
والله ذلّت أمية سيدتنا الكبيرة
رغماً اعله الشماته تبقىٰ زينب أميرة
تأسر اللي سبوها هيه اول اسيرة
زينب اجت منتصره
ذلّت يزيد ابقصره
حيوها بنت الزهره
يـَماشين...
ابمنهجها ما مصيوبة
كل خطوة بي مهيوبة
سيرة عشگ مكتوبة
للحسين...
ـــــــــــــــــــــــــ ــــــــــــــــــــــــ
كلمات الشاعر : ميثاق الحمداني
تــدوين : Zahraa.alobaidi
1447 ه
MP3...تحميــل + إستمــاع
رد مع اقتباس