( عَلـي الأكبـر لو عَلـي حَيـدر.... )
وليدي المزيون الخيال
حاجب عينه تگول اهلال
چن جده ومتروس افعال
قائد عالقادة
سد وردهم مثل الماي
ركضهم بالبر حفاي
شردوا صاحوا هذا الحاي
زمزير السادة
من اشوفه وليدي يجبل علي
كلشي بيه ايصير اله مو الي
يحبه جده المرتضى من الزغر
وهوه المربي علي يطلع علي
وارث العزم .. جده بالإسم .. من علي لعلي الأكبر
لجده ينتمي .. وليده هاشمي .. هذا تربية حيدر
چنه حيدره .. حلمه خيبره .. بكربلاء يتكرر
كرار لو ثار كل همي ينجلي
والناس اتصيح علي يشبه علي
( عَلـي الأكبـر لو عَلـي حَيـدر.... )
واحد ويشوفونه هواي
يسحگ بيهم رايح جاي
من چفه امبين رماي
ويصيب العايل
واگف هوهَ وملچ الموت
بس الريح اگباله اتفوت
زلزال من ايصيح ابصوت
چن عمه الكافل
اشما كبر ويا جماله كبر
تسجد لحسنه الشمس والگمر
يطهر الشوف ابجماله علي
حتى يوسف عن جماله اعتذر
گباله مو وگف .. واحد وعرف .. بيده يلزم الصارم
لعاده يبتلي .. البيه عزم علي .. راجع لنسب هاشم
يطشر ويلم .. خورس الزلم .. حصته راس الن غانم
بالراس نيران اليگربله يصطلي
والناس اتصيح علي يشبه علي
( عَلـي الأكبـر لو عَلـي حَيـدر.... )
يحارب من وجهه ومگفاه
يگول اشما هد عالوياه
گالوا فكنه لوجه الله
ماظلت وادم
مثل اهلهَ نشمي وجَحّجاح
يذريهم مثل المرواح
محصول وطبهم فلاح
يحصد بالصارم
من اشمن عطره انسى الحزن
يمه يوگف كلشي حتى الزمن
من يجيني ابطوله احسن بالأمن
كل مسافاته اتجاهي حظن
من ركه الفرس .. گطعوا النفس .. طبها شبل ابوطالب
هوس الكفو .. بالحرب منو .. جده حيدر الغالب
عينه چن سهم .. يرمي عالزلم .. قوسه كسرة الحاجب
سردال خيال بأفعاله معتلي
والناس اتصيح علي يشبه علي
( عَلـي الأكبـر لو عَلـي حَيـدر.... )
ثگل اچفوفه امبين چان
مو مالت واحد عطشان
گللهم هذا الميدان
انسدت بيبانه
جيش اشكبره وعدكم ماي
شو محد گايش وياي
شطكم مايگدر لضماي
ابن حسين انه
ابگلبه واحساسه مشاعر نبي
بنظرة وحدة يفتهم مطلبي
من وسامه وجهه اخذ مدد
يكفي اسمه واللقب طالبي
اشراعه بالهوه .. لاوه نينوى .. الشافه ظل شهر يرجف
قارعة وطلع .. واقعة ووقع .. والارض غدت تخسف
اشوس وصعب .. كلشي بي رعب .. حتى مهرته تخوف
أعداد ماهاد حي ابن الولي
والناس اتصيح علي يشبه علي
( عَلـي الأكبـر لو عَلـي حَيـدر.... )
كـلـمـات الـشـاعـر : عـزيز الـميــاحـي
تــدوين : zhraa al obaidi
MP3
رد مع اقتباس