كون بهاي مرتاحه
وجه گلبي الحزن والنوح بيبان
مِتى تنفتح للمخلوگ بيبان !!
الضمير يعيش من ٱتعيش بي(بان)
وٱذا ماتت نِشَيِعهم سويّه
ياحرَّه يَمملوحه
يَطَيره الغافيه بدوحه
البياض بروحچ ءمن التين
ناصع وٱنكتبله يعيش
وي گيعان المْلوحه
ويَطَير الماتعز روحه
هَدّيتي السمه بجرحين
وبعد جنحانچ اتغنيلچ اطروحه
ورا ٱطروحه
وخْيوط الشمس تنمد
حدر رجليچ مرجوحه
هضيمه انشوفچ ابلا راي
وٱصابع صفر من ابعيد
والبصمات ممسوحه!!
ياحلوَه يحبّابه
تره گبلچ ٱهوايه ٱطيور مذبوحه!!
ذبح مانعرف ٱسبابه
حلال الذبِح !!
بس مرهون كله برگبة الغابه
وقميص ٱمدمَّه وذيابه
وماعندي حچي الينگال
وٱغرِّد بيه وٱتباهه
يَمسوَدّة قصيدهْ بليل
بس شاعرها يقراهه
يغنّيهه وترد روحه
وتموت ٱسرارها وياها
وياخذني الخيال ابعيد
غاد ءمن المْكابر غاد
وبعدني ٱستاهدچ حرَّه و(بِنِيَّه) ٱبساع تنطي ٱمراد
وچن كابوس راودني
وٱغمُّض والحلم ينعاد
أفزَّن وٱفرك ٱعيوني
وٱلف مرَّه انكث ازياگي
وٱچذب سالفة (بغداد) !!
الريش الطايح ٱعله الگاع
موشغلچ!! شغل صيّاد!!
ياوردهْ يفوّاحه يبذرة عافية ابّستان
وٱعله الراگ سبّاحه
حمامات السّلام اتموت !!
والغربان بالساحه!!؟
وهضيمه الفارس ءمنيطيح والدم صاير وشاحه
وگالوْ كاتله ٱسلاحه !!
ولو ماتخطر ٱعله البال
وياهوْ انه وٱصدگ ٱلطَّير
ءمن ٱشوفه يرفرف ابلا ريش
ولاصَدِّگ جناحه ينتّف جناحه!! ؟
أگول ٱوداعة الله بهاي
كون بهاي لچ راحه
أگول وداعة الله بهاي
كون بهاي مرتاحه
رد مع اقتباس