الدنيا سفرة والعمر كلش گصير
صعبه حيل تريد تگضيها بضنون
ناسك تمثل صفت مابيها روح
مثل مسرح تختلف بيه الفنون
أمشي وحدك بالك تشيل اليطيح
اطيح انت والخلص عمره حنون
وها يعيني الليل طوّل وانتِ ليش
مسلهمه تنطرين صحبانچ يجون
وانتِ ياروحي شبعد صبرچ يدوم
عالغِدَر والراح والطبعه يخون
وانتَ ياگلبي شعحب تنبض حنان
وانتَ تدري الصحبة صارت بالصحون
حيلچن راح وعمر خلّص ونين
ليش كل يوم وتگولن ها تهون
عوفن اطباع الحزن رفگتها موت
واليروح يروح عيّشنه بجنون
لا تردن عالحٍقَد والحچيه بوه
السكته منجل والصبر بيه السنون


توفيق الصكبان