آني ادري النجوم العاليات اتطيح
لذلك ما بنيت اعله النجم داري
كلما زاد بيّه من السنين اجروح
ما ينكِسِر خلگي ويوگف اصراري
آنه المنتچي اعله جروحي المبينات
صح تنشاف ، بس ما كشفن اسراري
أصاحب كل گلب أبيض بين الناس
من گد ما أحب صار العشگ جاري
چواكيچ الوكت بالضهر الها آثار
بقه خلگي عدل وانعوج مسماري
أمشي بدرب تركض تعتنيه الناس
شما تمشي الخلگ ما تمسح آثاري
صح نخلة وسماري بجذعي تارك لون
بس ابيض گلب لو شفت جمّاري
واثق من خطوتي وراسي شايل تاج
أنا الخشبة الكِسَرْت سنون منشاري
ضهر لاصحابي واگف ما صرت سچين
وبگاع المحب ما اشتل اعذاري
گالولي عطشنا وصرت الهم ماي
وگالولي بردنا وما طفت ناري
يضل بذاكرة خطّاري طعم الماي
الهيل يضل عمر بلسان خطّاري
الياخذ حگّي گوّه يضل عمر مديون
مثل بدوي ابد ما طيّحت ثاري
واضل عالي ، مثل جيْت الهوه العالي
اشگد الغيم عالي ، وما يجي ابّالي
تتانيني الخلگ وعيونهم بسماي
ابفرح يتعايدون بطلعة اهلالي
أنا مثل الذهب ينجاب للعرسان
يظل بعين ناسه شما لِمَع غالي
أنا مثل السما وبخلگي ما ملّيت
من كل النجوم النايمه بجالي
ما خلّيت سبع اعيون عالبيبان
الحسود يموت حرگه ودمعته اتلالي
ولأن أدري النجوم العاليات اتطيح
اشما يعلَن ابد ما جاسن اخيالي


حسن العنزي