هاي اذاني التوبه بس عديها
الناس ما تسوه من اموت اعليها
هيه گطره وضاله امچلبه عليڪ
حسين فدوه استرني لا بديها
يالحسين لايذين ابصايتڪ
يالحسين شعدنه غير اقرايتڪ
واذا اروح ساعه عن اعيونڪ
گبل گوم بيه نزل شارتڪ
فدوه اتروحلڪ كلها.. خدامڪ امدللها
حتى الوادم العوجه.. بالمجلس تعدلها
يا عزيز الله وعزيز الوادم
بخت يرادلها اصيرن خادم
..................
قصرت حد ما طلعت من الدرب
هسه اجيت افتحلي گلبڪ خل اطب
اشلع بگلبڪ وميخالف تگول
اليحب لازم يطلعلڪ گلب
علي وياڪ صيحلي وربيني
علي وياڪ خاف زلفت عيني
والايام والعمر من دونڪ
يالحسين امداهه اسنيني
طلبه وطامع بردڪ.. لا تحرمني من عندڪ
صعبه نحلفڪ بزينب.. بس خلفتڪ بولدڪ
يا عزيز الله وعزيز الوادم
بخت يرادلها اصيرن خادم
................
صدگ ما نستاهلڪ بس تدري زين
وين ننطي اوجوهنه اخلاف الحُسين
وعترفلڪ زاير وغلطان اجيت
وبلكت اطيحهه لأجل ام البنين
غلطانين والسماح من ايدڪ
غلطانين نعترف ونريدڪ
تعبناڪ وانت ابونه الغالي
وما تنعاد وانه هم اوليدڪ
احبڪ ترضى ما ترضى.. گلبي بڪيفكم نبضه
والما گعد بقرايه.. ما يگعد بعد حضه
يا عزيز الله وعزيز الوادم
بخت يرادلها اصيرن خادم
...............
ليش بس اعليڪ مو عيب البچي
وليش كل طايح عليكم ينتچي
والحبڪ لازم تكتله وراڪ
انت ما رايد ابنادم بس حچي
مجانين بيك يابو سكينه
مجانين خيرڪ مغطينه
مطشرين وانت محد لامڪ
بس كل هذا ترجع تلم بينه
عدمن صايره بله؟.. بس راس وگعد صله
وحنه كلشي ما نسوه.. انطانه اوليده عبدالله
يا عزيز الله وعزيز الوادم
بخت يرادلها اصيرن خادم
................
الله لا يحرمنه من هذا العزاء
يا وفي بس احنه مو گد الوفاء
خير مابينه وعلي لو بينه خير
كون من نوصل نموت بكربلاء
حرامات هادين اچفوفڪ
حرامات بس شهر ونعوفڪ
عالتقصير يا سواد اوجوهنه
تمر ايام عادي اذا ما شوفڪ
والتقصير من عندي.. انه معطل المهدي
بس وداعت الزهره.. دومڪ گاعد ابچبدي
يا عزيز الله وعزيز الوادم
بخت يرادلها اصيرن خادم
...............
لـ علي مالڪ الموسوي
رد مع اقتباس