وصل بينه العمر حد رجفة الايد
وتحت رمش الجفن حفنة تجاعيد
حدّبنه عله طاري الليل والخوف
ننطر وي حلمنه يمر ولو عيد
قطار العمر مر ولا امل بيه
وغزانه الشيب كلنه بلا مواعيد
كل شهگة نفس تلچمنه بالروح
كل نگلة جدم نتوچه عالايد
تحت قرص الشمس دمعاتنه تفور
ونگّضي الليل نبچي بلا رواديد
اثر مسرى الدمع بخدودنه انهار
يفيض لوَّحده…ولوَّحده يهيد
نخبن بالجروح خبان بخبان
نرجف والدمايه تزيد وتزيد
گضيناها امل ها باچر تهون
لچن بعض الجروح تريد تجديد
ايّسنه وبعد ما ظل ابد حيل
تكترنه وعرفنه العمر ميفيد
غطينه الجرح برماد السنين
متانين الزمن ماندري شيريد
اشتكينه وعددينه دموع واحزان
وتاليها انحكمنه بلا شواهيد
توفيق الصكبان..
رد مع اقتباس