على صخره اتدحرج ما يخضّر عود
أعرفه وزرعته وعاندت وأصبر

لأن عود الزرعته انطاني كلمه يعيش
شلونك من أزرعك ؟ رد عليه: أثمر

وعاندت الگمر يطلع وأمد بالشوگ
وزدت لهفه ومحنه وما عرفت اجزر

خذت ذبة النهر من يزعل وي الريح
يذب لومه إعله روحه وبالجرف يطبر

وأشوفه الروج عالي والعواصف موت
گلبي وما يهم ويجازف ويبحر

عمر خلصته عايش خشبة الگصاب
عليها گبال عيني بفرحتي يوذِّر

وما اكلب بعد جبت العمر محماس
الدله التنمدح والگمگم يخدّر

وبعد فوگ الرمل ما ادگ وتد وانساه
والخيمه وحبلها وي الهوه تجرجر

واشبه طيحته من يوكع الفخار
اليسند ينكسر والمستند يكسر



سمير صبيح