كلمات: رعد الجريخي
~~~~~
هاشم وين هاشم تحضر الليله
تفزع للنعش والكاظم اتشيله
~~~~
تفزع للنعش هاشم رواياها
وموكب للغريب اجيب وياها
ومحلاها الدموع اتصير محلاها

بدموع الحزن مأتم ينصبون
وكون اجنازته احبابه اليحضرون

وشيوخ العشاير كون تبجيله
تفزع للنعش والكاظم اتشيله
~~~~~
ما صارت گبلها وهاي مو عاده
ميتهم يظل ما تحضر الساده
غربه الحضرته وما بيهم أولاده

جا وين اليروح ويگطع البيد
ويوصل حي هله وناسه الأجاويد

كل واحد يجي والمدمع ايسيله
تفزع للنعش والكاظم اتشيله
~~~~~~
عاده لليموت الناس تتعنه
واحبابه وهله تتصارخ ابحنه
يشيوخ العشاير وينكم عنه

ما اضنن عليكم تخفي الأعلوم
وراهبهم غريب ومات مسموم

طارش للرضا مسرع نوديله
تفزع للنعش والكاظم اتشيله
~~~~~
ما بين العرب عادات معروفه
تحضر للغريب احبابه وتشوفه
الكاظم حديد ابساگه وجفوفه

يا ويلي الغربته التلجم الروح
ساگه مرضرض ومحمل جروح

وين اعمومته الما ترضه بالعيله
تفزع للنعش والكاظم اتشيله
~~~~
ليش اجنازة المسموم مطروحه
لا يمه هله لا دمعه مسفوحه
صعبه وللغيور اتزيد جروحه

ليش اتشيعه اربع حماميل
ولا يمه لطم لا مدمع يسيل

لا يمه عشيره وناعي ينعيله
تفزع للنعش والكاظم اتشيله
~~~~~
غريب الوحده بدنياه وبموته
لا ناعي عليه الينسمع صوته
الليله الموالي النوح ميفوته

للكاظم ينوح وتهمل العين
ذكرنه بمصايه امصاب الحسين

مطروح وعليه شحت حماميله
تفزع للنعش والكاظم اتشيله