كلمات: حسين كاظم الشبلاوي
~~~~~~
هذا التابوت الوحده تسولف نظراته امتانه
امبين تابوت الخوه متاني يشيلونه اخوانه
ماتت من همها .. جي محد يمها
وحيده .. وحيده
~~~~~~
بأخر ايامي تعلعلت تعبني موتي
ما ترضه تطلع روحي إذا ما اشوف اخوتي
حته من اموت معلعله جا ليمت ارتاح
شيجيبهم خلصوا ذبح يا روحي موتي
هاي روحي ..
تطلع وترجع عليكم ما تجوها
هاي روحي ..
تموت زينب والله بس تشوف اخوها
تعرفونه الجاي ينازع بأيده يسولف سالفته
ولمن اشرت بجفي جف حسين تذكرته
كلساع اتذكر .. واذبل واتحسر
وحيده .. وحيده
~~~~~
سولفوا بالماي وعطش ريجك ذكرته
مو طيب الماي وعلي جي ما شربته
شيصير لو قبل الذبح منگطينلك ماي
ما ضگته قبل الموت جي ما ضايگه انته
والله صعبه ..
وحدي وخوان خير من الله عندي
والله صعبه ..
غربه التشيل النعش مو خال ولدي
اطلبكم تعب الخوه وكون اليوم اتردونه
ابجوا عليه انه استاهل وكلكم نعشي تشيلونه
من تجفنوني .. بهيده ويه متوني
وحيده .. وحيده
~~~~~
ما بين ميته وگمت احس وما بين عدله
بأخر نفس وتخيلت جني اعله هزله
مو بس اليعيش وعلي من دون الحسين
حته اليموت بلايه اخو يشبع مذله
شلون بله ..
يعني حته بموتي هم محد يجيني
شلون بله ..
كافي من افراگكم تعبتوا عيني
هذا الما حسبته انه ميته ومكسورة خاطر
ميت يبجي اعله اخوانه هذا الضيم الما صاير
انه ام سبع اخوه .. الكلش تسوه
وحيده .. وحيده
~~~~~~
انه المره الشبعت تعب والكلهن انه
ونمرد من الهم مرد گلبي وحنانه
دللت حته جروحي جي من وادم اعزاز
وردت اعتب وشفت العتب موش بمجانه
ليش اعاتب ..
العتب لو بي فايده جا جاب اخوتي
ليش اعاتب ..
همه غافين وانه اعله فراش موتي
كلما تتعثر حرمه بين ازلام تذكروني
انه الماتت مسبيه وگبري بگاع الهضموني
معنه الغربه انه .. والميته امتانه
وحيده .. وحيده
~~~~~~~
يا خويه احسدك ما ضگت لوعات فرگاك
يخنگ بلياك الهوه مو مثل الوياك
بس وحده يا خويه وعلي ظلت بگلبي
تحضني وتشمني وتحط راسي اعله يمناك
جان حلمي ..
عليه تلتمون وتعصرون اديه
جان حلمي ..
وتنبني بنصكم الحضره الزينبيه
الميت لو يمه اخوانه يرتاح ويخلص ضيمه
موتي بگاع الشام انه هم يشبه ركض الهيمه
الريح اليمكم هب .. يگللكم زينب
وحيده .. وحيده
رد مع اقتباس