مساكم الله بالخير
درر & درات
سالفة ورباط
#غضيب92


أم چامل والواوي اكو صنف من الطيور نادر جدا يسموها اهل الريف (أم چامل) وهاي الطيرة زغيرة تشبه السمان بس هاي الطيرة عدها عيب خلقي برجليها وهذا العيب ما يخليها تگدر تنبش التراب يعني ما تگدر تحفر . وهي من طبيعتها ما تبيض الا بجحر . فمن يجي موسم البيض وتريد تبيض تروح تتفق وي الواوي . ويكون الاتفاق وثيقة شرف بين الطرفين (خلو خط احمر جوة وثيقة شرف لان مارة بينة هواي) . فيصير الاتفاق بأن الواوي يحفر جحر لأم چامل حتى تبيض بيه مقابل . تنطيه اول بيضة من تبيض وتنطيه أخر فرخ من يفگس البيض . نحسبها حساب نگول خطية ام جامل ليش تدفع بيضة وفرخ للواوي وهم يعتبرون من فلذة كبدها ف نظل نحقد على الواوي ونگول هذا استغلالي ومصلحچي بس بالحقيقة يأأخواني ام چامل هي الي ألمقشمرة الواوي وهي المستفادة والواوي مضحوك عليه . لا تستغربون هسه اني اگلكم شلون؟ حسب الروايات المسندة والاخبار المتدوالة بأن المدعوة الطيرة أم چامل لديها علم مسبق بأن اول بيضة تضعها تكون فاسدة ولا فائدة منها وان بقيت ستفسد باقي البيض فهي ستضطر للتخلص منها . واما اخر فرخ فسيكون (مرعوص) غير كامل الخلقة وسيشكل عليها عقبة كبيرة تمنعها من ممارس حياتها الطبيعية وايضا ستضطر للتخلص منه. وبذلك يكون الواوي قد قدم خدمة كبيرة للطيرة أم چامل فقد حفر لها جحر لتضع بيضها وخلصها من البيضة الفاسدة وخلصها من الفرخ المرعوص الذي سيكون عائق امامها. فالواوي يظن أنه الرابح ولكن في الحقيقة هو مضحوك عليه!!! شاهد سالفتنه تره سالفة أم چامل والواوي نفس سالفتنا (من أنضحك علينا بالحصه ألتموينية بالحمص والماش والمعجون الاسود) والأمر من ذلك خلصت سنة ٢٠٢٥ وهمه منطين ثمان وجبات بس!!! ماندري حكومتنا سنتها چم شهر ثمانية لو اثنعش شهر؟؟؟ عجيب بكلشي سرقة وفساد!!!
وسلامتكم
ياطيبين