بعيونك حزن ينشاف
ها يالغمضت عينك
أشوفك بالنعش محمول
وأصيحن يا علي وينك

ها يالغمضت عيناك
وعيون الضوة إنسدت
واتخلخل نظام الكون
من إچفوفك إنهدت
إخذها الدنيا من تروح
عسن راحت ولا ردت
يعرنين الجبال الشم
يمقدم على الأقدم
يا أول نفس ينشم
لون الغيرة ما ينشاف
بس ينشاف بجبينك

بعيونك حزن ينشاف
ها يالغمضت عينك
أشوفك بالنعش محمول
وأصيحن يا علي وينك

واحد سيفك وثوبك
والقرآن هم واحد
منهو إنت النزلت اليوم
لو أنت الذي صاعد؟
يصگار الخصم يا حيف
نايم واليضد گاعد
يإذن الله الوعت كل شي
يا ماي اِو هوه ويا ضي
يخيمة اعلى الخلگ يا فيّ
لو نبچي عليك اِعيون
ما ينسد بعض دينك

بعيونك حزن ينشاف
ها يالغمضت عينك
أشوفك بالنعش محمول
وأصيحن يا علي وينك

مو عجبة يموت الموت
ولا عجبة نزف دمك
أعجب بالنعش خلوك
وإنت الگاع متلمك
جرح رآسك فلا ياذيك
ونين أيتامك إيألمك
يا نسمة هوة الغرگان
يوجه الله إبجسم إنسان
تشبع غيرك اِو جوعان
يجيك السائل اِو مسكين
تنطيه خبزة حسينك

بعيونك حزن ينشاف
ها يالغمضت عينك
أشوفك بالنعش محمول
وأصيحن يا علي وينك

مو بس العمود ايطيح
دنيا اتطيح من ترحل
ناس اتحب تموت اوياك
بس الموت ما يقبل
بچاك السيف والميدان
يحل المالهن كل حل
يا كسرتنا من اِتغيب
من عدها الرضيع اِيشيب
بده سمهم الشماتة اِيصيب
روس أيتامك ابلا ظل
شمس وتريد چفينك

بعيونك حزن ينشاف
ها يالغمضت عينك
أشوفك بالنعش محمول
وأصيحن يا علي وينك

كل شي اتغير ابفرگاك
حتى الفجر صار أسود
يمر ليل الحزن نمرود
نار الفرگة ما تبرد
يرداد العده يا سور
من اتطيح نتفرهد
بحر والظلمة ناب اَسباع
او سفينتنا بلاية اشراع
وبعيدة علينا الگاع
ما ندري المنية اتحول
بين أحبابك اِو بينك

بعيونك حزن ينشاف
ها يالغمضت عينك
أشوفك بالنعش محمول
وأصيحن يا علي وينك