ليش تعوفني لوحدي؟
ما ترحمني هاي الناس
گوم وياي عاونّي
ورانا طيحة العباس
أبوسك وين دليني
وأنتَ مهشم من الراس
علي القرآن ما يرهم
نشيله بدون ما ينباس
هديت حيلي وداعة أُمي الزهره
كلما أدير عيوني أصادف وذره
تارس الگاع وليدي مثل المطره
|من بعيد صاحوا شيل مذبوحك|
| طلّعوا روحي و طلّعوا روحك |
مو ذاك حيلي الأولي
بشيباتي أجيت أركض علي
وبعمري هذا الركض ياذيني
يابويه الأكبر لا تبچيني..(٢)
ـــــــــــــــــــــــــ ـــــــــــــــــــــــــ ــــــــــــ
أجيتك من بعيد أبچي
و نسّاني العطش حزني
لمن شفتك متمدد
صحت ياخويه وأنتَ أبني
ندهتك يامتعبني
أكعد كونك تحبني!
لا آنه شبعت منك
ولا أنتَ شبعت مني
عباس خويه ألحگ لأخيك عِينه
شوف أبن اخوك الوادم مگطعينه
بعيوني كون تراب موش بعينه
|مشلوع گلبي و فرهدوا حيلي|
| لا أطيح يالعباس تچّيلي |
إلحگ عَلَي يابو الفضل
موت الولد ما ينحمل
ماي العيون و فگده يعميني
يابويه الأكبر لا تبچيني..(٢)
ـــــــــــــــــــــــــ ـــــــــــــــــــــــــ ــــــــــــ
المسافه من الخيم لهنا
كل نگلة جدم غربه
شلون أمشيها بأجدامي
و هيَ على المُهُر صعبه؟!
لازم گلبي و يصيحون
حسين أتصوب بگلبه
أبوك شسوه للوادم
ببيش الوادم تطلبه؟
يابويه أرد لخيامنا بيا حيله؟
صير بمكاني شلون أصبّر ليلى؟
چا نعش ابوك حسين ياهو يشيله
|محتار أبوك و خلصوها اعزازه|
| تريدلها إبن يا بويه الجنازه |
بس الصدك ما أظن نعش
حصران البليل أهدعش
ميت و صاح أُم عون لميني
يابويه الأكبر لا تبچيني..(٢)
ـــــــــــــــــــــــــ ـــــــــــــــــــــــــ ــــــــــــ
ساعات و يذبحونه
وياخذنا المُهُر و يرد
أذا برماح شالونا
صير بصفي لا تبعد
معزتك يا علي تخيّل
مذبوح و عليك أنشد
أنزع محبسك بويه
هنانه الوادم تفرهد!
ساعات و يعذبونها العلوية
محضرين خيل هواي تسحگ بيّه
ساعات و يسمونها المسبيه
| منا لساعه يحترگن خيامي |
|و بصدري شجره يصيرن سهامي|
و أبني العليل بنينوى
يبدّون گدامه الدوه
كل جمره تچوي أطفالي تچويني
يابويه الأكبر لا تبچيني..(٢)
ـــــــــــــــــــــــــ ـــــــــــــــــــــــــ ــــــــــــ
أنا الهظمتني بس وحده
و من عندها أنزرف چبدي
أرخص شي طلبته الماي
و آنه الماي مو عندي
أنا الصحباني عافوني!
و أجه هسه السره لولدي
شويه و راح أضل وحدي
ﷲ يعينهن بعدي
ينچفي الوالد من يشوف وليده
فوگ المُهُر تروح و ترد أيده
صابك علي يالصوبيته بجيده
|من أيدي أنزلك حتى أشيل أيدي|
| و أدعي على كلمن گطّع وليدي |
مرفوع راسي بكل وكت
بس حتى ألمّك دنگت
للخيمه أردك بويه خليني
يابويه الأكبر لا تبچيني..(٢)
ـــــــــــــــــــــــــ ـــــــــــــــــــــــــ ــــــــــــ
- يوليدي الاكبر لاتبجيني
الرادود | سيد فاقد الموسوي
الشاعر | سعد شميل
الكاتب | ميرزا محمد المياحي
رد مع اقتباس