حيدر المثله شلون نسولف عنّه
حيدر بيده النار و بيده الجنه
الأيتام بوكته بخير
ياكل من چفوفه الطير حيدر
ـــــــــــــــــــــــــ ـــــــــــــــــــــــــ ــــــــــــ
انشگ جدار الكعبه اله
والباري هيچ أستقبله
ما سواها ﷲ لكل واحد
بس لمحمد سولفك
و ببيته لمن ضيفك
ابطن أُمك شافك ساجد
خلّه البيت الك موضع ولاده
والباقي البشر بس للعباده
حيدر مايكمل دين ﷲ بدونه
حيدر باني الإسلام على متونه
شما تطلب منه يصير
ياكل من چفوفه الخير حيدر..(٢)
ـــــــــــــــــــــــــ ـــــــــــــــــــــــــ ــــــــــــ
لا بالعرب لا بالفرس
بس أنت ردتله الشمس
شما مديت أيديك يجرالك
تحضر محمد لو ندب
و غايب بتوزيع الذهب
حب الدنيا ماهو ببالك
أنت الدنيا حيدر طلگتها
شگد عرضت إلك بس عبرتها
حيدر فاتح بيته بوجه احبابه
حيدر بوجه الدنيا مقفل بابه
خلّه الدنيا بفعله تحير
ياكل من چفوفه الخير حيدر..(٢)
ـــــــــــــــــــــــــ ـــــــــــــــــــــــــ ــــــــــــ
لو واحد احتاجه يفز
يرتاح لو وزع خبز
بنص الليل و يمشي ملثم
حاكم و يخدم بالشعب
و للفقره يفرح لو تعب
يسألونه على أسمه و ماعلّم
على أچتافه يشيل أكل اليتامى
الطحين آثاره واصل للعمامه
حيدر ما واحد يوصل لأفعاله
حيدر گال أنهض صلي لچتّاله
بس ﷲ يعرفه بتفسير
ياكل من چفوفه الخير حيدر..(٢)
ـــــــــــــــــــــــــ ـــــــــــــــــــــــــ ــــــــــــ
لأصنامهم من هدمّت
ياحيدر شلون صعدت؟
حط أچتافه و شالك طـٰه
من الحرب لو واحد شرد
تضل سالفه لِولد الولد
واليشرد منك يتباهه
أهل الميت بسيفك يفرحون
و بعين العشيره شگد يكبرون
حيدر يكتل بس القاده بسيفه
حيدر يختار من الجيش بكيفه
كل العالم بيده يدير
ياكل من چفوفه الخير حيدر..(٢)
ـــــــــــــــــــــــــ ـــــــــــــــــــــــــ ــــــــــــ
بمصابك هوايه بچن
عيون زينب والحسن
ويبچي حسين تشوفه گبالك
بآخر نفس من دنيتك
چانت عظيمه وصيتك
تنزف و توصي بچتّالك
أذا التاريخ كله آنه قريته
ولا واحد كتب هيچي بوصيته
حيدر مجروح و ما عاف الرحمه
حيدر نعمه و كتلوا هاي النعمه
عنه الگلناه مو تصوير
ياكل من چفوفه الخير حيدر..(٢)
ـــــــــــــــــــــــــ ـــــــــــــــــــــــــ ـــــــــــ
قصيدة: بيده الجنه و بيده النار
الرادود | سيد فاقد الموسوي
الشاعر | محمد البطحاوي
الكاتب | ميرزا محمد المياحي
رد مع اقتباس
المشاركة الأصلية كتبت بواسطة حسام البيرماني شيزر
