القصيدة : صار الغروب
الرادود : سيد فاقد الموسوي
الشاعر : سيد محمد الموسوي
هذا اليفارگ غالي يشبع قهر من تالي
.................................................. .
صار الغروب ودمعي وازاني
شلعان گلبي من أكبر اخواني
فراگ الحسن ياناس هد حيلي
بحزام ظهري الوكت جازاني
شلون بيه شلون بيه
كول ياكلبي خطيه
كافي توجعني عله اخوي
خل اموت وهاي هيه
هذا اليفارگ غالي يشبع قهر من تالي
.............................
أيامنا الوياك عشناهه
علحلوه والحلوه گضيناهه
خلافك الدنيا دارت ويانه
وبس المصايب خويه شفناها
مفارگينه مفارگينه
تونه والليله اربعينه
راح اخوي وحيلي راح
وهسه عيني تريد عينه
هذا اليفارگ غالي يشبع قهر من تالي
...........................
ليليه كلبي وياي يتوازه
كلما اغمض يفگد عزازه
الجاب العمر شايلنه بمتونه
شلنا بهاي متونه جنازه
انباگ حيلي انباگ حيلي
طرت الخوه دليلي
من كثر مابيه نار
الموت مايشفي غليلي
هذا اليفارگ غالي يشبع قهر من تالي
............................
ملتمه كلها بأربعينيتك
وين التحبهم من اهل بيتك
خلينه يمك شمعة القاسم
والگبر غطيناه بخاچيتك
حاسبينك حاسبينك
موش ميت حاسبينك
نايم وما نادهينك
لا انت النومك طويل
ولا عمرنه مفززينك
هذا اليفارگ غالي يشبع قهر من تالي
..........................
خليني اشبگك لا يمر باجر
باجر ضلوعي حصة الحافر
باجر خلافك ماتضل خيمه
وركاض زينب يكسر الخاطر
يانهيبه ويانهيبه
طگت الحرمة مصيبه
تنچتف زينب وراي
وتنولي وتمشي غريبه
هذا اليفارگ غالي يشبع قهر من تالي
.........................
رد مع اقتباس
المشاركة الأصلية كتبت بواسطة حسام البيرماني شيزر
