عوّدتني آتنفّسك وآخدر فراشه ،
وآغفه وثيابي عطر .
عوّدتني ،
تغسل بصوتك وجه صبحي ...
وآفز ريّان والبسمه فجر .
عوّدتني وغبت كَمره ،
وطحت من اِيدك شذر .
مدري يا واهس خذاك وفاركَتني .
ولسّه آكَلّك ليش هيجي ،
ولسّه ما سامع عذر .
يا ملذتك ،
يا نسيم كَرنفلك ...
والمالحات آمن السوالف ...
والعيون اليبجن آمن الشوك ...
ويصلّي الشعر .
لسّه من دمعك شذر حار آعلى جفّي ،
ومن نبض كَلبك على كَلبي سطر .
ولسّه آكَلّك ليش هيجي ،
ولسّه ما سامع عذر .
جنت من أكَعد بعد شبرين منك ،
تجيسني الظلمه وأخاف .
تجيسني الظلمه وآضم روحي بكّذلتك ،
وآلبد كَلادة شذر .
كَلبي يبرد ،
وتطلع الرجفه آمن آصابيعي ...
وجيس براحتي خيوط الحرير ...
وتشتعل كل المري بروحي ...
وآنام آمن السكر ،
وجان كل مرّه يذب روحه عليّه ...
يطيح خدران الخصر .
ومدري يا واهس خذاك وفاركَتني .
ولسّه ما سامع عذر .
طالت الصفنه وطفيت ،
وما صفن كَلبك وجابك شوك ...
لا جابك نذر .
ولسّه آكَلّك ليش هيجي
ليش عالما ينشبع منّه ...
ورهم كلّه آعلى كَلبي ، فاركَتني ؟
كون من أول بوجهي ....
ساد شباج الخمر .
كون وآنت هلال ...
داير وجهك الشفاف ،
مو وآنت بدر .
كون ما بايكَني مني ، جا مشيت ،
وجان كَبلك أعتذر .
وكون كون ،
ولسّه آكَلّك ليش غايب .
ولسّه ما سامع عذر .
عبد الكريم القصاب
رد مع اقتباس