أبدي العِشره بهاي العَشرة
و خّلي الزهره تشد حيلك
عشگك عيده بصفحه جديدة
و چلّب بأيده اليدعيلك
بالحُب هايم فوگ الوادم
رتبة خادم خلّيلك
هذا الحب للذنوب
للما يعرف يتوب
فرصة بباب الگلوب للتوبة
للما يندل منين
لمضيع المشيتين
خلي يدك باب الحسين بذنوبة
هذا حُب صدگ آنه بالعشگ
أبچي و أحترگ "لأمامي"
حزني و الهظم يوصل للعظم
فشله من أضم "هيامي"
لو شفت علم شالته الخدم
يمشي للخيم "سلامي"
حُسَيْن حُسَيْن..(٢)
ـــــــــــــــــــــــــ ـــــــــــــــــــــــــ ــــــــــــ
حبهم و أندل خاطر تكمل
عيش المقتل صوره و دم
لاگي المصرع شوف و أسمع
بس لا ترجع و أتقدم
موت بواهس بالحب نافس
جون أو عابس و أتعلم
"هَل مِنْ نَاصِر" الصوت
لو من يمك يفوت
موت و حاول تموت لخيامه
لو بالعاشر يصيح
گوم و سابگ الريح
ياهو الأول يطيح گدامه
سابگ الوقت يمّه لو طحت
فرصه لو متت "عظيمه"
هذا يادرب بي حلو الحرب
يعني تنغلب "هظيمه"
عطّل الزمن دوّر المشن
عايز الظعن "يتيمه"
حُسَيْن حُسَيْن..(٢)
ـــــــــــــــــــــــــ ـــــــــــــــــــــــــ ــــــــــــ
شد الهمّه بهاي الخدمه
و أمسح دمه من الحافر
عيش بنوحك حضّر روحك
جيب جروحك للعاشر
إنطي شتگدر "چف أو منحر"
و شما تخسر ما خاسر!
چا همَّ اليحبون
لو رادوا يضحّون
سهله تصير العيون لعيونه
لو طاريه ينجاب
گمنا نحظّر الرگاب
اي والشايل الباب بمتونه
لو متت ألف موته تختلف
بإسمك أعترف "حبيبي"
قمة الربح يمك أنذبح
وأرضى بالرمح "نصيبي"
هذا إلك وعد يرجع العهد
وأنذبح بعد "حبيبي"
حُسَيْن حُسَيْن..(٢)
ـــــــــــــــــــــــــ ـــــــــــــــــــــــــ ــــــــــــ
- ابدي العشرة
الرادود | سيد فاقد الموسوي
الشاعر | حمزة الحسناوي
الكاتب | ميرزا محمد المياحي
رد مع اقتباس