ليش كل مايجي حسين و ننطره
ليش يطلع شمر يگطعله نحره؟
ليش دوم اليحبكم عينه حمره؟
وين ليمت ترد ثارك گضينا
وين وحدنا و الدنيا علينا
وين مولاي خاف أحنا البطينا
مولاي منك نستحي بإسمك لو ندبنا
خاف أَنتَ المتاني الفرج ومعطّلك ذنبنا
صح أحنا ماعندنا عذر بس أقبل عذرنا
هالمره خلّصنا صدك هالمره أنكسرنا
راحولك زلم من العاشر
راحولك بطى عليهم باچر
بيا زمان بيا زمان
بيا زمان تهل علينا؟ ..(٢)
ـــــــــــــــــــــــــ ـــــــــــــــــــــــــ ــــــــــــ
ضيم الضيم بدرب حيدر ضريبة
ضيم من طفكم و ذيچ النهيبة
ضيم شما نضحك تخضّر مصيبه
دوم البايع الدنيا بماي تُربه
دوم دم وجثث متروس دربه
دوم ثوب أسود ومشلوع گلبه
ودروب بالدنيا شكثر مابيهن خساره
والشيعي ماعنده درب بس درب الزياره
راحولنا الما دنگوا بس يم المناره
ما ينوخذ ثار المشه يمك يبقى ثاره
متانينك ما نشيل الطايح
ماتخلص " صالح بچف صالح "
بيا زمان بيا زمان
بيا زمان تهل علينا؟ ..(٢)
ـــــــــــــــــــــــــ ـــــــــــــــــــــــــ ــــــــــــ
آخ شما شمتوا بموت النشامه
آخ نتلثم و كلنا علامه
آخ ليمتى طلعتك بالسلامه
كون متانينك تغيرلنا هايه
كون هالمره أهلك مو سبايا
كون تحرگ خيمهم بالبدايه
لحسين ماتركض مره سالم يبقى نحره
وينام ما يشبع سحگ عبدﷲ على صدره
و الكاسر لأُمك ضلع تتمشى على گبره
ونطلعه من گبره ونرد عالحايط نعصره
واحدهم خلّه دم ينازع
الگالوا على حيدر رابع
بيا زمان بيا زمان
بيا زمان تهل علينا؟ ..(٢)
ـــــــــــــــــــــــــ ـــــــــــــــــــــــــ ــــــــــــ
هاي طبول الفرح ردّت والأعلام
هاي نفس السنين و نفس الأيام
هاي تعيّر السادة ليوم الشام
نار يالمهدي وصلت للعمايم
نار ما خلّت إلنا حزام سالم
نار يا علي كتلو علي صايم!
الناس الذبحت أهلك ردّت علينا ردّت
والشام يبن المرتضى من الفرحه تعبت
ياحيف ولد أُم الجمل بأولادك تشفّت
و دموعنا ريشه بنهر ياگود ﷲ تثبت
نطگ واحد شما نشيّع واحد
يا قائد ناسك بلا قائد
بيا زمان بيا زمان
بيا زمان تهل علينا؟ ..(٢)
ـــــــــــــــــــــــــ ـــــــــــــــــــــــــ ــــــــــــ
- يمته ترد الثار
الرادود | سيد فاقد الموسوي
الشاعر | حيدر الخزاعي
الكاتب | ميرزا محمد المياحي
رد مع اقتباس