شگد ذلّيت الماي البارد
و من ذبيته شگد أنهان

ليومك تستنكف من عنده
تشمره على الصبخه النهران

بكلشي يمرني تمر ببالي
بوكت الغربة و بالصحبان

هدوم الجدد من ألبسها
تذكرني بنومك عريان

أتباوعلك و تباوعلي
چفك ينزف و يأشرلي
أنتَ هنا و هنانه تگلي
يقصد گلبه و يقصد عينه

عينك حمره و لَيّه تناظر
و گلبك متأذي من الحافر
باليمنى من الحافر صاير
و كل هذا بنصه مخلينه

حسيناه حسيناه..(٢)
ـــــــــــــــــــــــــ ـــــــــــــــــــــــــ ــــــــــــ
وآنه صغير يعلموني أهلي
شلون أحچي و بيّه مكيفين

گول أسم فلان يگلولي
و صحت بإسمك " گلت حسين "

بس أنتَ اليندلك گلبي
هاي الوادم مدري منين

و بچفوفي مخوفها أعميها
لغيرك من تشتاگ العين

مجلس حده و ينشگ ثوبي
أنتَ الماي الغطّه حبوبي
اليرويني و يغسلّي ذنوبي
يا ماي المات بلا ماي

وغيرك ماي مغيسل شفته
لحد يبست ريجي و ماجسته
بس أنتَ لو صح ثاني أنتَ
يا واحد بس أنتَ هواي

حسيناه حسيناه..(٢)
ـــــــــــــــــــــــــ ـــــــــــــــــــــــــ ــــــــــــ
تخيل دنيا و مابيها أنتَ
لا نلطم ، لا نمشي نزور

صفنه بلا خدمه ولا دمعه
و لا مقتل لا مجلس شور!

اليتخيلها و يصفن بيها
يشبعك ممنون و مشكور

بثگل أسهامك ثاري الدنيا
لو ما ناقذها بعاشور

الدنيا بدون أيامك تخلس
ما يحملها اليشعر و يحس
العدلين متانين المجلس
و چيَ عندهم مجلس عدلين

لو ما عاشور و هالنعمه
و دهرت خدامك و اللمه
يعني أقصد لو ما هالخدمه
چا ميت صايرلي سنين

حسيناه حسيناه..(٢)
ـــــــــــــــــــــــــ ـــــــــــــــــــــــــ ــــــــــــ
داخل باللّٰه وداخل صحنك
آنه أبن آدم صلفه عيونه

آنه التنطونه و يچفيكم
و يبعد عنكم و تردّونه

و بمتونه البيهن دم أبنه
شايلني حسين على متونه

مثل الگبر الممسوح أسمه
هيچي يضيع الما تردونه

والما چلّب بيكم يتعب
ومثل هدوم الميت ينذب
يا مصعبهن بس الأصعب
من تنشف ماتبچي العين

التختاره وأنتَ توده
حتى طيور الحضره تفگده
لو مَر ما تشرد من عنده
كلها تحب الحَبه حسين

حسيناه حسيناه..(٢)
ـــــــــــــــــــــــــ ـــــــــــــــــــــــــ ــــــــــــ
يندل كلشي بلايه عيونه
أبن آدم من يشوف بگلبه

يرجع صحنك هيمه بعيني
وأتباوع ذبحك لو أطبه

و ميت عريان أتباوعلك
هاي الصعبه و تجزي الصعبه

أبچي و ودّي أقماش الدنيا
كله نجيبه يغطي القُبه

تهظمني الناس الما تسوه
أستنكف يرحولك فدوه
كلشي بموتتهم يتسوه
و فزعه و وادم يلتمون

ما يوصل لأسمك يتشيع
و يمشي بتابوت و يتودع
و أنتَ حسين تموت مگطّع
هاي الما ترهم و شلون!

حسيناه حسيناه..(٢)
ـــــــــــــــــــــــــ ـــــــــــــــــــــــــ ــــــــــــ
- الما جلّب بيكم يتعب
الرادود | سيد فافد الموسوي
الشاعر | حيدر الخزاعي
الكاتب | ميرزا محمد المياحي