لا أنت النهاية ولا أخير الخط
يكَطرة ماي ابَشرك بعده ذاك الشط
اعله حطة ترست إيد حسين والعباس
موج من الرجال ال عالجرح تنحط
كِثرْ ما شكَفوا اعله الخيم زخ اسهام
صاروا مو بحاجة لبس المرقّط
ما قاتلوا واحد منّه رچوة خير
يتهدد عليهم وين الملكَط
ولدك وانته المعلمهم ايضحكون
إذا سمعوا خصمهم بالحچي اتشرّط
تجر نفسك بهيبة مطمئن وي ما
تستشعر اصوابك والرمح يضغط
مستشهد امفرّع مو بتحصينات
مو موتت غفل لو طيحة امورط
يزلمة الوصلته اتِختِل الفرقاطات
يَ مخلي اليطير بحسرة المهبط
على الذبّاحة بالطَّف بالوصف تعتيم
ما شفنا الملامح بس اسم ينخط
ما شفنا اليصفكَـ يا هو مِن حسين
ما بين الحوافر والثرى اتوسَّط
تسلقنا بجماجمنا الّه كَُمنا انشوف
ونفرزن الجاني اونِعرف الخطط
عرفنا وجوهّا الكَطعت نزاع القوم
صورنا بديهم دم المكَمط
حتماً تنكتل ما دام صاحب رأي
حريتك أكيد تغيض المربّط
مو بس منتصر بالسمه اتكملِ الصّوم
هو إنته أَكملتهِن بَس على الأحوط
اليعرف الخصم خَ يحاول يكَلّه
هذوله الكاونتهم تدري يا ملّه؟
إحنا العدنه كَبل المعركة إجراءات
ما نضرب عدونا النلكَه بي علّة
ونقيمه الخصم ونحطه بالميزان
كون الكفّة تِهدل من ثكَل غلَّه
كون براسه شر مو بس اسم شرّير
يسوه ويستحق السّيف النسلّه
علي معلمنا ما نبرز لياهو الچّان
البوكت الحروب يطكَـ البحلّه
نكتل ننتصر ننكتل منتصرين
حتمية وأكيده وقطعاً إو الّه
سباعيتنا ما صارت امن التعداد
الإسلامي اليحيرك كثرة لو قلّه
لا ذاك الرقم بس لليعَرف ايصوم
ما يفرز ضماير ترفض الذلّة
وإلا ما نفعنا بأمة المليار
وبهاي الصفارة وهالكبر كلّه
بديت أفهم شنو ال من عندي مطلوب
ال يخليني عند الأمة مرغوب
أدني الركَبة لليوميلي بالسيف
وأطبطب على الچتافه امحمّلة اذنوب
وأموت بسكتة ما أسولف متت ليش
ولا أرد الكتلني بنفس الأسلوب
حتى ال يذبح امن ايخلص يكَول
إي هذا الخلوق الوجهه محبوب
أنه الحيد اليخلي سباعها تلوب
وأنا اليستاحشونه ابوكت الغروب
وراي المعركة يكنسونها ارماد
وكُتل صم الصّخور الصامتة اتذوب
أنا السّاكت نعم بس صمتة محسوب
التّبين جيته بدكَات الكَلوب
أنا ابن المشّط الدخان عالشيب
أنا ابن الصبّر أخته وراسه مصلوب
أنا ابن ال عالنهر قاريله بيتين
يسون جم الف ديوان مكتوب
ما فزِّيت من چيلات مرعوب
وأنا اللّويت اذانه اليرفض ايتوب
مهابة من الله ما متصنع بشي
الله خالق المهيوب مهيوب
أنه الوشل لخوته الدمع اليهلّه
اليدك چادر ابصف چادر يحلّه
أنه المنطي السبع والحوك والبي خير
حتى أردع الشّين ال بي ألف خله
چنت أكّدر أضم إخواني من الموت
أأمن باب بيتي الياهو يوصلّه؟
لكن من دَريت اهناك أختنا اتصيح
متوزّر طويت النصه والتلّه
صحت لإخواني دكَوا على المضايف سور
احرسوهن بدمكم مو بسترلّه
واچفوا أرواحكم يم الشِّباب هناك
لا يدخل غريب وتنچفي الدلَّة
ما وديت واحد من يروح أرتاح
وديت الضحكته اتطَّيِب العلّة
وديت الينام اويمّه المصلّاه
اليفزّ يصلي وحده ومحّد يكَلّه
وديت المشه اوعِرسه الخميس الجاي
حرت ابّين چفنه ونصبت الكلّة
وديت الترك ذاك الطفل محتار
ليش بلايه والد دون البحلّه؟
حيهم من صحت ما كمّلتهه الميم
طبوا كالبرق چتّالة الذلّة
ما كَالوا اشعندنه ولا شلون وليش
ما حطوا شروط اعله الوطن إلّه
اليريد أنساهم ايردهم شرط عدلين
ورجع الهُم ظَناهم كلمن لظلّه
تفريغ الصوت : أكرم الياسري
حتما تنكتل - الشاعر الكبير ايهاب المالكي - قصيدة إلى الشهيد سيد علي الخامنئي
رد مع اقتباس
المشاركة الأصلية كتبت بواسطة ساق البامبو
