القصيدة: يا گلبي
أداء: مسلم الوائلي
كلمات: حسين كاظم الشبلاوي
~~~~
حسين .. حسين
~~~~~~~
يا گلبي يا گلبي ألمن بعد تنبض
والزهره تعبانه وما بيه حيل اركض

انه حته بنومي اسمع واحد يصيح بگفاي
خويه بس غطيلي جسمي بطلت ما اريد ماي
ماتوا اعزازك يگلبي شعاجبك بالعيشه هاي

امنيتي انامن ساعه وحده والله هاي عيوني تعبن
عيوني خربهن دمعهن وعوزهن وجهك ويعمن
اوگف وفضها يگلبي كلها ماتت ضال ألمن
ساعه اگولن ليش راحوا ساعه اگولن ليش اضلن
~~~~~~~
عافوني عافوني والصعبه مو هايه
مو بس اخيتهم جنت ألهم امايه

الموت حگ وحگي اريده حلوه عد غيري الحياة
انه مات بعيني كلشي من سمعت حسين مات
انه مو بس اليتامه جنت اباري الأمهات

شلت ضيم الناس كلها وماكو واحد ضيمي شاله
الجان مابي حيل يبجي اني جنت ابجي ابداله
خويه الذابحك مابي محنه يهز بالراس بنذاله
بجعب رمحه يدني بيه والحجي المو خوش گاله
~~~~~
بحضن امي من جنه جان الوكت احله
جنت اشتم بصدرك مابي ولا نبله

مره بالصدفه رمل صار اعله ثوبك شفته بيك
طاحت دموعي وجيتك خايفه وامسح بديك
هسه شفت الگاع والدم والزلم كلها عليك

گلبي وازاني شوگه ردني لايام الطفوله
هذا البنص الحوافر جان في للخوه طوله
حجي هواي بگلبي باقي الك ما لحگت اگوله
حسين مالت زينب انت شلون ماخوذ بسهوله
~~~~~
وين أمي وين أمي صيحوها صيحوها
بست ابنج بنحره وبالسيف مسحوها

يمه التنومينه جنتي بحضنج وشابع دلال
هسه نايم عالتراب وجنه شجره من النبال
ردت اخلي فوگه اديه وما لگيت الهن مجال

عود دنگت ارد ألمه بس گلت مو مال ألمه
من كثر ما ساحگينه من العبايه يطيح جسمه
غير اليموت بمكانه شجابه يم الخيمه دمه
رحت ادور خنصر ايده وباوعت مبيوگ هدمه
~~~~~~~
هاي انه هاي انه الركضت وتعبانه
محمد نسه رسمي گتله انه هاي انه

المغرب يگولون يخنگ وانه خانگني النهار
نحر عبدالله زغير ورمحه من ذني الكبار
انه صح مجويه بس والزهره گلبي عليك حار

جنت انسه ولد عندي جنت ملتهيه بولدكم
جنت اگولن وين اخوتي وانه قبل شويه يمكم
هواي مطشرين اخوتي وماكو حصران اعله گدكم
عندي ضلت بس عباتي وراح اغطيكم بدمكم
°°°°°°°°°°°°°°°°°°°°°°°°° °°°°°°°°°°°