القصيدة: مو عليله
أداء: مسلم الوائلي
كلمات: علي اكبر الغرابي
~~~~~~~
ما درت عينك عليه وباوعتلي
بمحملك فارغ مجاني وما صحتلي

وين شايل .. بالمحامل
بويه .. بويه
~~~~~
مو عليله امسابگ امشي ويه الضعن لو گتلي گومي
مو عليله محضره من ليلة امس صرت اهدومي
ما اتعبك وانت تدري وياك اروح بطرگ خدري
بهالسفر لو ما خذتني يعني اخذت وياك عمري

احسبلها وتعثر الجلمه بسؤالي
يمته ابوي يگلي يبنيتي تعالي

وتمشي تالي .. بلا تعالي
بويه .. بويه
~~~~~
وياك اخذني ممشه ما اصعد عله اظهور المحامل
وياك اخذني حته ما ابقه انتظر منك رسايل
لو رحت يتبده بيه كل سمار المغربيه
وابقه اضيع بذكرياتي بين عبدالله ورقيه

لو رحت باجر اظل راح بكسرتي
بنار المتانه احترگ واطفه بدمعتي

يا دمعتي .. من غربتي
بويه .. بويه
~~~~
هاي هيه وهاي اخر مره بيها اتصد عليه
هاي هيه من ملامح دمعتك ما بيك جيه
جنها اخر ساعه جنها وكلمن املزمه بأبنها
وليش بس انه الوحيده عاشت اعله اليوجعنها

سلمت روحي وي شمس المغربيه
من عرفت النظره اخر نظره اليه

هاي هيه .. وشبديه
بويه .. بويه
~~~~~
وين رايح انه ما متعوده اغفه إلا اعله ايدك
وين رايح هيه مو مال انتظر ساعي بريدك
انتظر وايدي اعله خدي هسه ابوي يگلي اصعدي
وادري ما ينطيك گلبك تمشي وتخليني وحدي

انت مو حي الله واحد من تسافر
انت ذاك التارس ابنيتك مشاعر

گلبي حاير .. لا تسافر
بويه .. بويه
~~~~~
والله حيره بين اشيل الوداعك بين اردها
والله حيره وخلت افراگك علي ياهو اليسدها
الغالي من يفگدله غالي تاكل بروحه الليالي
وانت بعدك بويه يمي وبين الشيب ابخيالي

گلبي ما ينطيني اشيل ايدي الوداعك
يالخذت روحي ودمع عيني ابمتاعك

من عفتني .. يتمتني
بويه .. بويه
°°°°°°°°°°°°°°°°°°°°°°°°° °°°°°°°°°°