ـــــــــــــــــــــــــ ـــــــــــــــــــــــــ ــــ
قصيدة | وصية الأب
أداء | مُسلم الوائلي
كلمات | عَلي الاكبر الغُرابي
ـــــــــــــــــــــــــ ـــــــــــــــــــــــــ ـــــ
يَا علي يا علي
آنه اوّل يوم شفت الدِنيا بي
وصاح ابوي إستمع يَـ ابني لمَطلبي
لا تِحب غير النبي وآل النبي !
ولا تِحب كل نَاصبي وسُفياني
هِيَ دِنيا وبيها شفت المُستحيل
وارد اذب مِن العِتب حِملي الثجيل
يَـ إبني احلّفك رايد بحَامي الدِخيل
غير حيدر بَالك تحب ثَاني
وِياك وَكتك لو علىٰ غَفلة خِلف
ورِجف گلبك بالشِدد مِثل السَعف
دِير عينك بوية لاطراف النَجف
وگلّه قدّمت الدَمع قُرباني
يَـ إبني لو همّك تريده يِنجلي
هِناك يم شُبّاچه وإصرخ يا عَلي
آنه گبلك بوية بالهَم مبتلي
لَچن حيدر ابد ما ينساني
يَـ إبني أذكر گبل مِن ضَكني الوكت
توجّهت وجهي لابو حسين وصحت
حمّلت همومي يم بابه ورحت
وارجع بدَمعاتي؟ ما خلّاني
يَـ إبني اريدك بالعِشگ گلبك چبير
لا تِساوم عَ الحقيقة ولا تحير
گلهم اوّل حيدر ويُبقىٰ الامير
وهاي مو مِن عندي مِن قُرآني
يَـ إبني اريدك كُون واضح مَوقفك
لا تخلّي الناصبي يستنزفك
حتّىٰ لو كَافر بحُبهم صنّفك
گلّه الله يريدني وسوّاني
آنه ابوية إعله العِشگ ربّاني
بحُب علي وعترة علي وصّاني
ـــــــــــــــــــــــــ ـــــــــــــــــــــــــ ـــــ