القصيدة: محرم بداية
أداء: مسلم الوائلي
كلمات: محمد رسول الحميري
~~~~
وين .. موجود حسين
جاوبته بگلب الخادم
روح .. وفي المذبوح
وارجع من ذنبك نادم
~~
شمقدم لحسين وهو مقدملك عباس
من تسهر عمرك ما توصل شوغة عمه انخاف
ادخل دين جروح العاشر واترك دين الناس
تخجل خاف انشوف دموعك جا زينب تنشاف
نعم محرم بدايه .. وراها تبدي الحكايه
وراها غربه وسبايه .. وراها موت وضحايه
شسوي يا ربي حيره .. ابن نبي اعله الحصيره
اميره صارت اسيره .. تذبها ديره اعله ديره
نار .. واطفال ازغار
ذبحوهم يوم العاشر
صوت .. يا ربي الموت
اهون من ليلة باجر
~~~~
يتراوالك منظر زينب من تسمع أيام
وتعيش بمأساة العاشر من تقره الميمون
اركض وي أطفال حسين وتفهم درب الشام
مجنون الما ينجن بيهم عابس مو مجنون
صعب اوصفه بقصيده .. امامي گطعوا وريده
امامي داسوا عضيده .. نفسهم بخنصر إيده
سبوا بناته اعلمودي .. طموحه يكسر قيودي
يگلها يا نفس جودي .. واجيت اجدد عهودي
جاي .. جايبلك ماي
يالعطشان من العاشر
طير .. عايش من خير
حنيتك هسه وباجر
~~~
يحسين بروح امك سجل اسمي ويه الخدام
استاهل لو ما استاهل ظلت يمك هاي
تاخذني الدنيه وارجعلك متندم كل عام
لو ارجع مكسور الخاطر لو تقبل مولاي
شرف اموت بعزائك .. يجيني حامل لوائك
يجيني خالص دعائك .. دمائي فدوه الدمائك
اخذني جوه الحوافر .. اخذني ظل للحراير
اخذني للحضره زاير .. بشر علاجه المناير
كون .. انعد مجنون
مجنونك تاج براسه
هاي .. رحمة مولاي
طيب ما يترك ناسه
~
شيسوي المشتاگ وماخذ كل عافيته الليل
يا باب يدگه المتلوع من طاري البيبان
هايم ببنادم ما خلت شي من عنده الخيل
ما خلولك حرمة ميت يا اطهر انسان
قميصه رايح مسافه .. عطش لگيت اعله شافه
اخيه طايح وسافه .. شمر يرفسه بصلافه
نظرته للخيمه جانت .. دمعته بعيونه بانت
منيته هاليله حانت .. هظيمه والأمه خانت
بيش .. باعوك وليش
عطشان وكلش ذابل
ناس .. غدروا عباس
ترابك ما تستاهل
~~~~
نيتك يبنادم من تلعب وي حسين اتضيع
ثنين تلاثه يطيحهن ويطردك بعدين
ليش من اول موقف تنغر وترخص وتبيع
ألعب وي الوادم كلها ولا تندگ بحسين
قضيتة مو للمجامل .. افهمه لا تبقه جاهل
اخدمه مو للتفاعل .. تعبنه من هالمسائل
اريد اعيش المصيبه .. اريد احس بالغريبه
امامي اسمع نحيبه .. رسولي ذبحوا حبيبه
شوف .. ذاك المجتوف
خلي السجاد بعينك
صون .. والخدمه تكون
ما بين حسين وبينك
°°°°°°°°°°°°°°°°°°°°°°°°° °°°°°°°°°°°°°°°
رد مع اقتباس