القصيدة: يا ابو دموع الحمره
أداء: مسلم الوائلي
كلمات: علي الأكبر الغرابي
~~~
يابو دموع الحمره .. بيا ديره ويا صحره
سافرت ويه جروحك .. وطالت هاي السفره
~~
گعدت امجدي اعله بابك گاعدين وننتظر
ضايعين وما عرفنه الليل من خيط الفجر
واحنه ما ندري اعله ياهي تبجي وعيونك حمر
ما نعرف الياذي گلبك يا مصاب ويا كسر
من باب امك الزهره
لو عالمنكسر ظهره
يا جرح الأشد مولاي
وألمن دمعتك حمره
يا مولاي وألمن .. راح عيونك يعمن
لأمك لو عماتك .. لو لحسينك يبجن
~~~
الغربه من تموت ناسك الغربه مو گاع ووطن
وفوگ مبجاك اعله زينب والسبي وذاك الضعن
من جديد جروح گلبك يا ابو صالح خضرن
من رحت يم العقيله وفارغ تشوف الصحن
آخ شمكثر جروحك
يالساگيهن بنوحك
رد الشام يا مولاي
يلجم گلبك وروحك
الله يساعد گلبك .. شگد الشام امعذبك
يالتعبان ومحد .. جاي يحس بتعبك
~~~
يا صور تكفي من ارسمك يا ابو صالح يا صور
منين ما اشوفك عليله وتنتظر لسه الخبر
منين ما اشوفك مسافه من المخيم للنهر
منين ما اصد الگه ظهرك مثل الحسين انكسر
شفتك سيدي بكلهن
وما صح واحد يحلهن
وبعيونك العلويات
مامش خيمه التلمهن
حگه المثلك حگه .. لو بسهام الفرگه
مذبوحات احلامه .. وما صح شي للملگه
~~
فدوه سولفلي اعله جرحك يالخلص عمرك جرح
گلي يا موقف يألمك واليلجمك يا رمح
منين ما اشوفك العاشر وتعبك طاري الذبح
مسافر اليا خيمه وحدك وشيبك بلون الصبح
من خيمه لعد خيمه
گلبك يفتر بضيمه
دورت الهذيج النار
غيمه وما تصح غيمه
سولفلي اعله جروحك .. يا مولاي ونوحك
ويا موقف يالغالي .. ياكل ظل بروحك
~
ياهو مثلك يا ابو صالح يحمل الما ينحمل
وياهو مثلك عينه شافت خلصوا اهله جتل
بين واحد گضه بسمه وبين مذبوح وطفل
وبين روس اعله العوالي وبين زينب عالهزل
يالباگ الدمع لونك
ألمن نسأل شلونك
وألمن تبجي يا مولاي
الله يساعد عيونك
ياهو المثلك صاير .. وياهو بگدك حاير
بين الخلصوا بالسم .. والخلصوا بالعاشر
°°°°°°°°°°°°°°°°°°°°°°°°° °°°°°°°°
رد مع اقتباس