القصيدة: انت وين
أداء: مسلم الوائلي
كلمات: حسن الترابي
~~
انت وين ..
انشد الماي اليصب عنك ودورك
انت وين ..
حلفت حته الهوه وگتله اعله عطرك
بيا حزن وبيا عذاب
ما گضه وياك الغياب
انت وين .. انت وين
~~~
يا غايب وحزنك مطر
يسگي اليحبونك قهر
غير العشگ غير السهر
.. شيحط بالعيون
عنك نشدت اخر گمر
ووديتلك بيد النهر
كل الحجي يالمنتظر
.. ياكل بالضنون
هواي الحجي الما ينكتب
غير الكتبته .. بعيوني شلته
شيريد بعتابه المحب
لو لح بالعتاب .. بس لمة احباب
تانيتك بنص صحره حب
وينگط احلام .. يالمهدي وأيام
انتظرتك مو سراب
ما گضه وياك الغياب
انت وين .. انت وين
~~~~
بكل شجره اخط ذكرة حزن
جواها احط اسمك واحن
بالصحره ادورك والمدن
.. بالحر والفياي
ما عندي بس هذا الگلب
ساعه بسلم ساعه بحرب
مو عيسى بس دوم انصلب
.. ادخيلك يمولاي
بشباج الحسين شكثر
بالملگه داعي .. ترحم ضياعي
عالفرگه مو حل الصبر
ما تنحل بموت .. ماكو الها تابوت
والمهدي يالمهدي انعصر
لو گالوا اتعود .. غير انت موجود
ماكو غير دموعي باب
ما گضه وياك الغياب
انت وين .. انت وين
~
عطشني گد ما تنذكر
ومن گلبي زعلان الصبر
يالمهدي ما ظل كل عذر
.. جندوب الأعذار
انت الگضو بالطف هله
واليدري بحسين انوله
مو ثاري ثارك كربله
.. يا سيد الثار
لهنانه ونكف الحجي
وصلت للحسين .. وصلت للحسين
عليمن يغايب تنتجي
لو طاح الغروب .. والثوب مسلوب
انه العرف بس البجي
وما راضي عن هاي .. شلون انت مولاي
والمصاب اكبر مصاب
ما گضه وياك الغياب
انت وين .. انت وين
~~~~
هذا انه عود المو وفي
من حزني ما امل وكتفي
لو گالوا حسين انجفي
.. جا حالك شلون
نص طوله راح من السحگ
والمنه ظل ما ينشبگ
بعيونه دم ما تنطبگ
.. شصاير بالعيون
بس انت شاهد عالجره
من هدت الخيل .. حد ما گضه الحيل
حسينك تبده اعله الثره
يالمهدي مو ماي .. ضلوع وحجي هواي
يحز اعله كيفه بمنحره
ذباحه گدام .. زينب والخيام
ارسومه غيرها التراب
ما گضه وياك الغياب
انت وين .. انت وين
~~~~
هواي الحجي بس اخره
طلعن علاويكم تره
مخدره اتگود مخدره
.. محد لحگهن
بيهن حده حادي الضعن
للسوگ طبن وستحن
جر الحبل وتعثرن
.. بالكوفه كلهن
يا ابو العبي حمره العبي
ملونها العتاب .. دم بيها وتراب
هذا الضعن لهل النبي
والبيه حداي .. مو هاشمي الجاي
حادي الفواطم اجنبي
ومن نوخ النوگ .. يالمهدي بالسوگ
والكفلهن راسه شاب
ما گضه وياك الغياب
انت وين .. انت وين
رد مع اقتباس
المشاركة الأصلية كتبت بواسطة KASSAR
