من اديم احساس يمتد روح تشبه مستحاك
سولفت عيني وي گبرك من رسمتك للجفن صورة غريب
وصَلّت بـ خلگي البواچي سنين ملگة من اشتعل دمي وطفيت
ورثت عمري بجفاك و خلص بـ اول تعال
منين اجيك بروحي مسدودة الشوارع
وانتي تدري وما اجيت
هودر بخاطر ضحكتي الشيب
وتبدة اعلى گاع موادعك صبري وبچيت
و وهستني بدين بيه ريحة صرايف هل تبعتك طور اله
ورتلت شوفي بصورك واستحيت
من اديم احساس يمتد روح تشبه مستحاك
اليكتب بضني العشگ للمبتلين
يشرك بطيفك نهر جفني الكسرته بناس يفرحها الوداع
وين اشوفك خاطر اتبده على طولك مستحين
واددت ليل الضنون و كاسرت وحشت صفنتي بذكرياتك
وانگطع خيط الضمير وطاحت من چفوفه ناس تغازل الله بطور بيه ضحكت ونين
مرني صوتك مو ربيع وذبّل بروحي الخضار
لا تجيني وخاطرك مكسور خاف اكره ضحكتي
وينكسر بيه الفرح كسرت غريب
واتبع الدين الجديد الحلل النوم اعله جفن العاشگيين
علمتني شلون اصلي بواهسك دمعي السواجي
الماي من يعطش جرف يشرب خياله
ويلبس احلام النخل جيت حصار
الكاع من يگصر فرحها تفصل غيوم السماء
لخاطرها عيد وتغسل بوجه الگمر ليل النهار
گتلي باجر نلتقي باول رساله ونشعل الدنيا برسول
ونطفه من يكبر عشگنه ونرسم الدمعه انتظار
بيه ليل مناطرك خاطر محطه لكاسره سنين انتظارك
لمته اشوفك جايني بواهس قطار
يل عفتني تراب تدري الوحشه ريح
خايف اطشر تعب صفنت شمس
باگو عمره وواعده بچف ضوه
من مشيت توحشت عيني وكبر حزني ولبسته
وشيّب بصدري الهوا
يل عفتني ابين هجرك والسنين انطيني چفك
خاف بيه اعثر واطيح
لا توادعني العمر ما بيه حصاد
تنتچي الحيطان من تمشي اعله خلكي
وينذبح صوتي من اصيح
يل عفتني ابين خلكي وخاطر حچاية بواچي
الناس كامت تكره اسمي
كله احس تصيح اجه الماعنده ام
كله احس تصيح اجه المايكره احد
چا گلتلي بروحتي تذبل حياتك
و چا گلتلي بذمتك فرحت خواتك
وين رايح والمسافات انطوت
والشوگ ردني الواهس احلام العمر
بريتي ضميت النفس چيه بيه صورك
حته لو ميت تعال الميت من يموت خطار الگبر
اسحك الضلمه بضواك وهل مسيت العافيه
بخاطر سماي واذن بروحي الفجر
ردني لايام الصبه لچف الطفوله
ماتت حچايتنه بعين الصور
خذني للگاع الرسمنه عليه روحي وروحك بچف المطر
ردني لاول مستحه لاخر محنه
ردني مو زين الكبر
بروحي شايلك نهر وسنين گاع
منين ما ميل يتبده وما كرهت مناطرك
ضال انتظر
باجر متانيك يم باب الجفن لابس فرحتي
استرخص من الله وتعال
باچر بروحي انشتل جيت حلم
ضلمه وطريج و بيه عذر تالي العمر
باچر تغني الشواطي بطور داخل
ما تبدل ثوب گلبك والمحنه انته ذاك الحنين
الكل شي بيك يصوغني دموع وحزن
كلشي بيك يردني سفانه وهلال من يمر تابوت چتال السفن
باچر مظفر يمر بيه بتوابيت القصايد لو سمع حن واني احن
وباچر من اعزف رجعتك تختنك فيروز وتبطل غناها وتستچن
باچر تردني لغناي لواهسي وبيك استراح
وليك اخضر سالفة وگاعين و چفوف ووطن
من تجي اتلگاك بـ احلامي الزغار
ب فطرة السبعين بعيوني الـ على فراگك گضن ..
باچر متانيك مو تنسه شگلتلك
حتى لو ميت تعال حتى لو ميت تعال
عزيز عسكر
رد مع اقتباس