تعبانه مابياش اتاني
وفراگ اهل گلبي عماني
يايمه...
لا هاب...
الگبل بيهم چنت لا خاف .. لاهاب
جفاهم شعل بيه جمر .. لاهاب
انه ملگه گمت الاگي الهوه... لاهاب
بلكي ايجيب ريحتهم علية
ـــــــــــــــــــــــــ ــــــــــــــــ
مشتاگة واعيوني اعلة درب أحبابي
وماجاب الي منهم خبر الإعـرابي
ـــــــــــــــــــــــــ ــــــــــــــــ
انه ام البنين انه
من الهجر تعبانه
مصوب دليلي عليكم ييمه
من الفرگه مامرتاحه
سيوف البعد ذباحه
ولا بيه حيل واجيكم ييمه
اصورّ الوداع ابعيني
اتشوگني واتبچيني
من اذكرهه شيلة اديكم ييمه
منكم خبر منتظرة
رياگ التحبكم مرة
يالرحتوا روحي انه بيكم يمه
يهل الهلا ديرانكم منكوبة
هم مثلي برماح الهجر مصيوبة
ـــــــــــــــــــــــــ ــــــــــــــــ
عذبني گلبي ابشوگه
وعيوني مامطبوگه
اجدامي ودمعتي ثجيله ييمه
شفت الجبال مدگنة
امودعنه مابي ملگة
اعرفته ابواچي العليله ييمه
المچان الـوداع امشي
ومن دمعي يثگل رمشي
والتراب فوگي اهيله ييمه
ابحسراتي اوگف وادعي
واترس اديه من دمعي
وفرگتكم ادري طويله ييمه
ياهو اليصبرني وسلفكم خالي
وانه المتانه ايگطع ابدلالي
ـــــــــــــــــــــــــ ــــــــــــــــ
طبع التعوفه احبابه
ايعيش اعله دگة بابه
ويتاني چف اليدفعه ييمه
من الفرگه خلصت روحي
ياهو اليشد اجروحي
وماظل حنين الافزعه ييمه
ومن العليله اتگلي
مامش خبر من اهلي
گلبي ابدمعها تشلعه ييمه
ابدرب المظعنين اگعد
وابچي عليكم وانشد
ومچاني من دمعه انگعه ييمه
بدربكم مشبوحه وتهل عيني
وكل لحظة الشوگ الهودج ايوديني
ـــــــــــــــــــــــــ ـــــــــــــــــ
ذاك المضيف العامر
مِترب يكدر الخاطر
ياوسفه محد يمره ييمه
بردت يحيف ادلاله
من فارگ اغلى ارجاله
وبينت على افيايه كسره ييمه
الماتطفه چانت ناره
امدنگ رجع خطاره
من ما لگه اعمامه خضره ييمه
وانه اشيصير ابحالي
ابچي الفگد ياغالي
حزني اعله ياطول اگدره ييمه
خطاركم يهضمنه لو مر بينه
من انگله راحوا كلهم وظلينه
ـــــــــــــــــــــــــ ـــــــــــــــــ
ارسم صور للملگة
من كل كتر محترگة
وبروحي خوف الاسيرة ييمه
أحلم لچن أحلامي
تگلي ضعنكم ضامي
كل واحد ابگلبه حيرة ييمه
لو بيه حيل اتبعته
ضعن اللزم چف اخته
وبالي على ام عون اديرة ييمه
بس الدروب اطويله
يظل ياهو للعليله
حيرة دليلي چبيرة ييمه
من يومكم ماناشفات ادموعي
واحترگن ابنيران گلبي اضلوعي
ـــــــــــــــــــــــــ ــــــــــــــــ
كلمات الشاعر | مصطفى حرب
ـــــــــــــــــــــــــ ـــــــــــــــــ
MP3
Zahraa Al obaidi
رد مع اقتباس
المشاركة الأصلية كتبت بواسطة علي الواسطي
