يافرح لو واهس الجنّة بمشيتك مانطيب
يافرح يازيبگ إركد
خل نلبسك من گلايدنه الحزينه
وخل نسمعك من غناوي الليل
ترنيمة مشانق
حتى تبچينه ويزتّك صبح الـ أولايه بريد
بلا تراب نريد نقراك أشتهينه
يا عتيج
جاي متبدّي لهيث
وتستراح
وتغبش لديرة أعله طولك
يمنه تگعد؟ ماتريد؟
إحنه نريد
يافرح بس النعاوي
وموگد الصرخات عـ الشفه نشيد
يا فرح
لمنه لحلاتك
جنطة نندار لـ سفرتك
سچة نمتد لـ مشيتك
بالمگاود حييييل لملمنه ونخضر بإيدك إيد
ليله سولفنه أعله گدّك
نجمة أمسيرين بالظلمة تعال
فوت بالختله
أثر چتال
يا أحله غريب
بس إلك
ما عفنا باب
أتدنّه يا أول غريب
تتنه بالصبخة جذر والـ ليل ذيب
ما تجيّس آخر صواب
يافرح لو واهس الجنّة بمشيتك
مانطيب
بلچي نتعوّد عليك
طيوف گذله
غنوة أحديثة
ومراجيح وعرايس
ألنه بألوانك نصيب؟
والله ما ظَن
جيستك مِثل الرصاصة
وگعدتك! هو أنتَ زيبگ
ما تهوّد
صوغة موادع گمرتك
صاحت من الفشله ضَيْ
ها كثر سولف على خدودي العذاب وما لگيتك
ها كثر چالي الحزن من روجة عيوني تغطّه
وما لگيتك
يافرح
وآنه بحظن وحشه بچيتك
غرّبَت لوني الشموس الجايّه تضوّي حزن
أوميلي فيْ
يا فرح مصلوبه أصابيعي ومشيت
أنتَ حيْ بغير ديرة
وآنه گَد أثيابي حيْ
مِن خدَر هذا الجحيم
شوي جسَد وشويّه نسمه
والبگايا تناغي موت
يا فرح مسكين چنّك
لا إلك بالبيت صورة
لا إلك بين الدرابين أمنيات
ولا إلك بالليّل صوت
جرغد أمّي مبلّل بمطرة وجع
والثوّب هندس
من عطشناك وبطيت
الهسّه وإحنه بلا صلح
وإنتَ تدري أمّي جنوبيّة عنيدة
تشح
على الجدمه يشح
لا وحگك تنكت عناد الزعل بس ما تشح
الجنوبيات فرشن للنعي
وفتحن شكو أزرار بجرح
وطاحت الـ آه بكبرها دموع من طين العراق
اليكبر بحزنه الملح
تصيح أم فلان آخ
يجيس كل شارب رمح
يا فرح ماتدري چنّك
حط على الرزّه حمامه
الباب يكبرلك غصن
ورّم الينبض خراب
لأن
گضاها
حزن
يغفه حزن
يصحه حزن
وأظن باچر حتى تابوته إيتشظّه
وينچفي من سكتّه الوادم حزن
حسين جبآر
رد مع اقتباس
