قصيدة [ وصل عاشورك ]
اداء | محمد الجنامي
كلمات | حسين الساعي
العراق - بغداد - شارع الكفاح
رابطة شعراء و رواديد أهل البيت (ع)
وصل عاشورك وروحي
على مصابك غدت جمرة
خدمتي ووگفتي ببابك
فضل من أمك الزهرة
أعيش بخير وبنعمة
الحمد لله على الخدمة
وصل عاشورك وناري
ابدليلي والدمع جاري
أشمّن حرمل المجلس
واخدّر چايك ابناري
مثل ما حزنت روحي
احزّن ديرتي وداري
امر من موكب لموكب
واشد للمجلس اوزاري
اشد اوزاري بهمّة
الحمد لله على الخدمة
وصل عاشورك وروحي
تحن لأيامك وتنعى
شكو مجلس على مصابك
يجر دلالي وايگطعه
وية ربعي ننصب الخيمة
ونهيئ مجلس الدمعة
و بين العتبة والمنبر
ادوّر امك البضعة
تون للمنسحگ جسمه
الحمد لله على الخدمة
السئلني وگلي شتداوم
اداوم گتله بالموكب
مثل تچلوبة الغرگان
اضل بالمنبر امچلب
نطيتك چلمة من صغري
و اوافيها الك واجب
اذا عفت المجالس هاي
ازيّن بيدي هالشارب
بخدمتك اوصل القمّة
الحمد لله على الخدمة
طعم زادك.. طعم چايك
طعم گعدات خدامك
طعم ليل الحسينية
ومحنّة هاي أيامك
مطر خيرك يبللنا
وخدم هاي احنا گدامك
فضل منك تخلينا
نطب خيمة من اخيامك
احب فيّك يبو اليمة
الحمد لله على الخدمة
بحياتي ودنيتي كلها
اللطم صاير الي واهس
الكراسي غَرّت الوادم
وأنا بفيّ منبرك جالس
امد إيدي الك وابچي
ويصيح ابضامري هاجس
أنا الما صير الك عابس
أريد شوية من عابس
مثلها ما تصح رحمة
الحمد لله على الخدمة
ألف رحمة على روح أمي
رغم ضيم الدهر والبين
خذتني لأمك الزهرة
وتحاچيها بدموع العين
جبت ابني واريدنچ
تسجلينه عبد لحسين
طفل بس من صرت خادم
كبر عمري الك ضعفين
أنا بصغري وصرت زلمة
الحمد لله على الخدمة
عشت عمري على احسابك
شريدن أنت تنطيني
اذا ما امد الك ايدي
امدّن المن ايديني
اذا ما اسمك ابدمي
ارد واگطع شرايني
بحياتي ودنيتي غيرك
فلا واحد ترس عيني
اليخدمك يرتفع اسمه
الحمد لله على الخدمة
رد مع اقتباس